Primeiru-Ministru, Marí Alkatiri, bainhira ko'alia hela ho Administradór SIT, António da Silva. Foto/MT.

DILI, (TATOLI) – Administradór Sentru Informasaun Turístika (SIT), António da Silva, hatete SIT iha orientasaun ba negósiu nian, nune’e iha futuru sei kolabora ho setór privadu sira atu bele hetan reseita ruma.

“Bazea ba dekretu lei númeru 5, alinea 6, SIT hanesan ajénsia autónoma ida parte Governu nian ne’ebé iha orientasaun ba negósiu, ne’ebé bá oin ita kolabora ho setór privadu sira para fasilita, para ami mós bele hetan reseita. Ami iha planu asaun ona atu funsiona SIT ne’e bele akomoda mós setór privadu sira-nia hakarak, ne’ebé iha sentru turizmu ne’e sai hanesan one spot”, António dehan iha SIT Lesidere, ohin.

Nune’e halo fatin ne’e sei foka ba sentru informasaun turístiku no foka ajénsia viajen sira ne’ebé bele fasilita diretamente turista sira.

“Ne’ebé sei halo atividade ne’e liuhusi kooperativa. Espera katak ita timoroan sira, ita-nia joven sira ne’ebé iha interese halo atividade iha área turizmu nian ne’e, ita bele eduka sira iha kooperativa artezanatu nian ou ajénsia viajen nian. Planu iha tiha ona, nia orientasaun ne’e sei bá iha ne’ebá”.

Iha momentu inaugurasaun SIT, 12 marsu 2018, Primeiru-Ministru, Marí Alkatiri, fó vizaun katak ekonomia Timor-Leste nian labele depende ba setór minarai, maibé oinsa buka mekanizmu atu diversifika, liuhusi servisu hamutuk entre setór turizmu no sira seluk hodi alkansa ekonomia ne’ebé di’ak.

“Laiha dúvidas katak ita-nia ekonomia tenke diversifika, no atu diversifika tenke iha vizaun transversál kuandu ita hakarak diversifika, turizmu ne’e indústria ida ne’ebé nia aplikasaun ne’e transversál, tanba ne’e turizmu mesak sei la la’o bá oin, turizmu tenke koopera ho setór sira seluk atu iha dezenvolvimentu ba ekonomia”.

Ministru Turizmu, Manuel Vong, hatete atu desenvolve zona turístika presiza kria Sentru Apiu Dezenvolvimentu Integradu no Abranjente (SADIA), husi ne’e maka ministériu relevante no stakeholder sira bele hola parte iha prosesu dezenvolvimentu hodi lori duni turizmu hanesan setór indústria ne’ebé transversál no kontribui ba iha dezenvolvimentu ekonómiku, kria kampu traballu, redusaun probreza no aumenta taxa ba Estadu.

Jornalista: Maria Auxiliadora

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here