Foto google.

DILI, (TATOLI) – Ministériu Negósiu Estranjeiru no Kooperasaun (MNEK) realiza semináriu kona-ba tratadu internasionál hodi sensibiliza liña ministériu sira liuhosi diretór jerál sira.

Sekretériu Jerál MNEK, Antonito de Araújo, hateten semináriu ne’e hodi koordena servisu MNEK no liña ministériu kona-ba instrumentu internasionál ne’ebé liga ho kompeténsia MNEK.

“Semináriu ne’e hodi koordena servisu MNEK no servisu liña ministériu sira, liuliu ba diretór jerál sira hodi iha responsabilidade atu trata asuntu internasionál hanesan tratadu, akordu, memorandum entendementu no seluktán ne’ebé iha relasaun internasionál”, tenik ba jornalista sira iha MNEK, ohin.

Hodi hatutan ministériu ba asuntu relasaun internasionál ne’e konvida liña ministériu atu implementa lei númeru 6/2010, 12 maiu 2010 kona-ba kompeténsia MNEK atu halo jestaun ba instrumentu internasionál husi prosesu kontaktu prelemináriu, negosiasaun kona-ba tratadu, akordu, nota entendementu to’o prosesu aprovasaun internu nian ne’ebé atu lori ba Konsellu Ministru ka ratifikasaun iha Parlamentu Nasionál.

Tuir nia haree ba nesesidade Ministru Negósiu Estranjeiru no Kooperasaun, Aurélio Guterres, husu atu iha semináriu hodi konvida dirijente ministériu sira hodi koordena no koopera ho MNEK kona-ba asuntu relasaun internasionál hodi servisu di’ak liután.

Hodi dehan durante ne’e ministériu balun halo akordu ka asina nota entendementu ruma iha rai liur sein koñesimentu ministériu kompetente, tanba ne’e presiza sensibiliza servisu ne’e.

“Durante ne’e servisu diak ona maibé haforsa liutan nesesidade koordenasaun entre ministériu sira ne’ebé mak karik iha planu hakarak halo akordu, tenke koordena ho MNEK”, katak.

Nune’e, nia realsa ba oin ministériu hotu ne’ebé iha planu atu estabelese akordu no halo negosiasaun ruma ka memorandum entendementu iha rai liur, tenke informa ka halo koordenasaun ho MNEK, tanba ministériu ne’e mak iha kompeténsia ba servisu tratadu internasionál.

Jornalista: Julia Chatarina

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here