Prezidente CNE, Alcino Barris. Foto Egas Cristovao

DILI, (TATOLI) – Atu evita violénsia iha kampaña eleitorál to’o eleisaun antesipada parlamentár, Prezidente Komisaun Nasionál Eleisaun (CNE-sigla portugés), Alcino Barris, husu ba partidu polítiku (ParPol) atu obedese regra eleitorál.

“Paktu unidade nia substánsia atu respeita lei, konstituisan no regra sira, nune’e bele kumpre demokrásia no liberdade ema hotu nian atu labele halo violénsia iha prosesu kampaña eleitorál no eleisaun”, Barris ba jornalista sira hafoin reúne ho reprezentante ParPol iha CNE, Kaikoli, ohin.

Enkontru ne’e, CNE aprezenta mós testu kompromisu ba asinatura paktu unidade nasionál no ParPol sira fó apresiasaun no sira sei asina paktu iha 7 abril.

Maibé paktu unidade sei hala’o iha loron rua nia laran, hahú iha 6 to’o 7 abril ho serimonia rituál no asinatura paktu.

ParPol sira ho hanoin pozitivu atu konkore iha festa demokrásia ne’ebé kompetetivu ho livre no justu, tanba eleisaun ne’e sai sasukat ida ba tinan lima.

Fundamentu hosi paktu mak ParPol sira tenke simu rezultadu no fó apoiu ba partidu eh koligasaun ne’ebé manan hodi kaer governu.

Alende ne’e, Alcino husu ba ParPol hotu atu kumpre regra tránzitu iha ámbitu kampaña eleitorál, tanba polísia sira sei halo atuasaun ba apoiante sira ne’ebé tuir kampaña kuandu komete infrasaun tránzitu nian, tanba akontesimentu mosu barak iha kampaña hodi rezulta ema kanek no mate iha perante situasaun polítika.

Kampaña eleitorál sei monu iha 10 abril.

Jornalista: Zezito Silva

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here