Prezidente CNE, Alcino Barris. Foto Egas Cristovao

DILI, (TATOLI) – Prezidente Komisaun Nasionál ba Eleisaun (CNE-sigla portugés), Alcino Barris, hatete orgaun eleitór hanesan CNE sei anúnsiu kalendáriu kampaña eleitór iha loron aban.

“Partidu Polítiku sira hatama hotu ona sira nia kalendáriu kampaña no ohin ami reune ho sira atu ko’alia karik oráriu balun soke malu iha ámbitu kampaña eleitorál”, Alcino Barris ba jornalista sira hafoin enkontru ho partidu polítiku sira iha CNE, Kaikoli, ohin.

Hosi enkontru ne’e, CNE ho reprezentante partidu polítiku hotu verifikasaun ba kalendáriu kampaña hafoin aban bele públika oráriu fixadu ba partidu hotu atu hatene, nune’e mós fahe ba seguransa sira hanesan Polísia Nasionál Timor-Leste (PNTL) atu persebe hodi fó seguransa eh akompañamentu kada partidu iha ámbitu kampaña eleitorál.

Antes ne’e, CNE uza sistema dijitál atu partidu polítiku sira bele manda kalendáriu kampaña liuhosi meiu elektrónika maibé partidu balun nia kalendáriu eleitorál soke malu ho partidu seluk, nune’e ohin verifika no ajusta hotu atu aban bele p’ublika tanba tuir prosedimentu legál, kalendáriu kampaña hatama hotu ona molok loron lima ba kampaña.

Enkuantu, atu konkore iha prosesu kampaña eleitorál to’o eleisaun antesipada mak partidu Partidu Esperansa Pátria (PEP), Partidu Demokrátiku (PD), Partidu Repúblikanu (PR), Frente Revolusionária Timor-Leste Independente (FRETILIN), Movimentu Sosiál Demokrata (MSD), Movimentu Dezenvolvimentu Nasionál (MDN), Frente Dezenvolvimentu Demokrátiku (FDD) no Aliansa Mudansa ba Progresu (AMP).

Entretantu, kampaña eleitorál sei akontese iha 10 abril no sei remata iha 9 maiu no eleisaun antesipada parlamentár sei realiza iha 12 maiu.

Jornalista: Zezito Silva

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here