Diálogu entre komunidade no Prezidente Repúblika, Francisco Guterres Lú Olo, liuhusi telekonferénsia. Imajen Mídia Palásiu PR.

DILI, (TATOLI) – Prezidente Repúblika, Francisco Guterres Lú Olo, husu atu komponente hotu iha munísipiu haat hanesan Manatuto, Baukau, Lautein no Vikeke kontinua fó sira-nia kontribuisaim ba eleisaun antesipada (EA) ne’ebé mai atu la’o iha pás no estabilidade nia laran.

Tuir Xefe Estadu fó kontribuisaun ba eleisaun nu’udar parte ida atu hametin liután demokrasia iha Nasaun ne’e.

Prezidente Lú Olo hato’o lia menon ne’e bainhira hala’o diálogu ho autoridade lokál, veteranu no organizasaun sosiedade sivil no partidu polítiku sira hosi Baukau, Vikeke, Lautein no Manatuto iha Baukau, kuarta, (4/4) ho objetivu atu hametin pás no estabilidade iha eleisaun antesipada.

Iha diálogu ne’e, Prezidente Repúblika esplika desizaun ne’ebé foti hodi hakotu krize polítika, desizaun ida ne’ebé atu fó kbiit ba povu hodi hili partidu polítiku sira atu ukun.

“Desizaun polítika ho eleisaun antesipada nu’udar esperiénsia dahuluk no sei sai lisaun dala ida de’it ba lider polítiku sira hotu hodi husik dalan ida ne’ebé moos ba jerasaun sira tuir mai”, tenik liuhosi telekonferénsia.

Telekonferénsia ho tema: “Promove Diálogu Hodi Garante Pás no Estabilidade iha Prosesu Eleisaun Antesipada” ne’e Prezidente Repúblika hakarak rona preokupasaun hosi autoridade lokál, organizasaun sosiedade sivíl, veteranu no partidu polítiku sira relasiona ho preparasaun ba eleisaun antesipada.

Prezidente Repúblika hetan akompañamentu hosi Ministru Administrasaun Estatál, Valentim Ximenes, Ministru Defeza no Seguransa, José Agostinho Somotxo’ Vise Ministru Dezenvolvimentu no Obras Públika, Renato Monteiro, Prezidente CNE, Alcino Barris no Diretór Jerál STAE, Acilino Manuel Branco, hodi hatán preokupasaun hosi autoridade sira kona-ba preparasaun ba eleisaun antesipada ligadu ho estrada, eletrisidade, seguransa no kestaun lojístika no kampaña eleitorál.

Diálogu liuhusi telekonferénsia ne’e nu’udar inisiativa dahuluk hosi Prezidente Repúblika atu halo tuir kompromisu polítiku hodi loke espasu ba povu atu bele ko’alia diretamente ho Xefe Estadu no sai Prezidente ba povu tomak.

Xefe Estadu halo ona diálogu dahuluk ho autoridade lokál, organizasaun sosiedade, veteranu no partidu polítiku sira hosi Bobonaro, Likisa no Ermera iha Maliana iha 9 marsu tinan ne’e.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here