Prezidente CI, Virgílio Guterres.

DILI (TATOLI)–Ofisiálmente Konsellu Imprensa-KI (CI-Sigla Portugés) aprova ona órgaun Komunikasaun Sosiál (KomSos) neen (6) hanesan Grupu Mídia Nasionál (GMN), Timor Post, Independent, Dili Weekly, Tempo Semanál no Mídia One Timor, rejistadu nu’udar órgaun komunikasaun sosiál ne’ebé professional.

Konsellu Imprensa (KI) aprova ona órgaun komunikasaun sosiál hamutuk neen no ami fó fixa rejistu ba sira, hosi mídia hirak ne’e mak Grupu Mídia Nasionál (GMN), Timor Post, Jornál Independent, Dili Weekly, maibé husu ba instituisaun mídia sira seluk atu bele mai halo rejistu,” Prezidente KI, Virgílio Guterres halo abertura ba programa enkontru kona-ba mekanizmu no polítika implementasaun atividade estájiu karteira profisionál ba jornalista sira.

Ohin iha, salaun Ministériu Obras Públiku, KI ofisiálmente entrega simbolikamente sertifikadu ba órgaun KomSos ne’ebé rejistradu, no iha tempu besik sei públika iha jornál da repúblika.

Enkuantu mídia sira ne’ebé seidauk rejistu tuir lei KomSos, KI husu atu mídia na’in sira kumpre. Alende ne’e mós KI iha ona planu no programa atu implementa estájiu karteira profisionál ba jornalista sira iha 2018.

Atu realiza programa estajiáriu KI sorumutu ho Diretór Mídia no Xefe Redasaun hosi kanál mídia nian hodi fó esplikasaun kona-ba mekanizmu no polítika implementasaun atividade estájiu karteira profisionál refere.

“Ami sei servisu hamutuk ho órgaun KomSos atu jornalista sira bele ba halo estájiu iha mídia sira, dahuluk ami diskute ho instituisaun mídia ko’alia kona-ba kritériu, nune’e sira bele halo akompañamentu.” Prezidente KI, esplika.

Tuir lei KomSos Nú 25/2014, fó kompeténsia ba KI hodi fó títulu profisionál liuhosi atribuisaun karteira profisionál ba jornalista.

Regulamentu Nú 7/2017 fó mandatu ba KI hodi aplika estájiu journalistic ba jornalista sira atu hetan karteira profisionál.

Entretantu, tuir lei KomSos iha artigu 16o ko’alia kona-ba estájiu profisionál no iha alínea dahuluk hateten estájiu profisionál hetan fatin iha órgaun KomSos hodi hakle’an koñesimentu tékniku no linguístiku estajiáriu sira nian, nune’e sira bele hetan koñesimentu sira kona-ba rejime jurídiku KomSos no direitu no devér natureza legál nian no étika profisaun jornalista nian.

Alínea lima hateten, órgaun KomSos fó sai sertifikadu ida kona-ba remata estájiu nian ne’ebé ho aproveitamentu, hamutuk ho dokumentu komprovativu kona-ba prátika hahalok hirak ho natureza jornalístiku ne’ebé refere iha númeru ida uluk.

Iha alínea neen ko’alia mós kona-ba kuandu estájiu remata ho ezame ida ne’ebé KI mak fó, no iha ne’ebá KI tenke hatudu koñesimentu sira kona-ba étika profisionál, direitu no devér sira jornalista nian.

Jornalista : Zezito Silva

Editór : Manuel Pinto

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here