Sekretáriu Estadu Juventude no Traballu, Nivio Magalhaẽs, hasoru malu ho kandidatu traballadór Austrália 2018. Foto Tatoli/Agapito dos Santos

DILI, (TATOLI) – Sekretáriu Estadu Juventude no Traballu (SEJT), Nívio Magalhães, hateten sei la tolera Funsionáriu Públiku haburas Korupsaun, Koluzaun no Nepotizmu (KKN) iha prosesu selesaun ba traballadór timoroan ne’ebé sei servisu iha Korea Súl no Austrália.

“Ha’u rona no hatene laiha toleransia ba atu KKN iha programa saida de’it ne’ebé implementa iha SEJT tanba programa sira ne’e tenke fó benefisiu ba povu la’ós ba grupu idaʺ, governante hato’o hafoin simu keixa hosi kandidatu servisu nain ba Austrália durante sorumutu ne’ebé hala’o iha Kaikoli, ohin.

Funsionáriu Públiku hetan ona diretu hosi Estadu liuhosi salaríu no fasilidade, tanba ne’e laiha fatin atu komete korupsaun hodi benefisia án.

ʺHa’u hatete ona ba funsionáriu hothotu hahú hosi diretór jerál to’o funsionáriu bai-bain ami mai iha ne’e ho objetivu ida de’it atu serbí povu ho loos, tanba ne’e ha’u husu ba kandidatu sira atu relata diretamente mai ha’u bainhira akonteseʺ, apela tan.

Tuir polítika governu sei aumenta númeru traballadór to’o rihun resin hodi ba servisu iha Austrália liliu fó oportunidade ba sira 2013.

Entretantu, kandidatu traballadora Austrália, Virginia Maria Nunes, hateten tuir ona prova orál no eskrita hosi SEJT iha 2013 no prenxe kritéria maibé seidauk desloka ba Austrália.

ʺHa’u prenxe kritéria hotu maibé to’o agora ha’u seidauk ba tanba ne’e ha’u husu atu tau mós perioridade ba kandidatu sira 2013ʺ, afirma.

Tuir oráriu kinta semana ne’e, SEJT hamutuk ho empregadór hosi Austrália sei fó teste ba kandidatu tranballadór 180 ne’ebé sei desloka ba Austrália iha tempu besik. Matéria teste maka fiziku, mentalidade no seluktán.

Jornalista: Agapito dos Santos

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here