Ministru Turizmu, Manuel Vong, bainhira partisipa iha sesibilizasaun ba matéria anti korrupsaun ne'ebé aprezenta husi Komisaun Anti Korrupsaun. Foto/MT.

DILI, (TATOLI) – Ministru Turizmu, Manuel Vong, hatete lei hirak ne’ebé prodús la fó oportunidade atu halo kreatividade no uza kompeténsia tomak hodi serbí povu ida ne’e ho di’ak, nune’e ministru preokupa tebes ho asesór sira ne’ebé durante ne’e prodús lei halo ema sai fali atan ba lei ne’e rasik.

“Ha’u preokupa lei hirak ne’ebé ita prodús implikasaun boot tebes ba ita atu halo kreatividade, inovasaun ba iha ita-nia prestasaun serbisu. Ita presiza tebes la’ós de’it atu muda ita-nia atitude, ita sira funsionáriu sira ne’e, ita hirak ne’ebé polítiku, maibé lei ne’e tenke hadi’a, reforma institusionál liuliu ba lei hirak ne’ebé prodús ha’u haree buat balu laiha klareza”, katak Vong iha ámbitu sensibilizasaun ba matéria anti korrupsaun iha Sentru Konvensaun Dili, ohin.

Lei hirak ne’ebé presiza hadi’a prisipalmente kona-ba prestasaun serbisu MT hanesan atividade service no ezemplu definisaun saida mak klaru kona-ba serbisu enterteneamentu tanba daudaun ne’e laiha.

“Tanba ne’e ita presiza define uluk lai, se la’e ita haree kuru-kuru, bola guling iha kintu-kantu mas saida mak nia definisaun, ne’ebé ita presiza hadi’a”.

Nune’e mós husu ba funsionáriu sira atu haforsa lideransa iha ministériu ida-idak nian atu domina mós saida mak nia papél importante tanba ema ida halo lei ne’e (asesór jurídiku sira) halo tuir sira-nia interpretasaun no nia implikasaun boot ba funsionáriu sira atu iha kreatividade ba serbisu.

“Tan ne’e reforma institusionál presiza hadi’a, hametin estrutura gabinete jurídiku iha Ministériu Turizmu nia laran ho ema timoroan, ho diretór sira ne’ebé mak iha laran tanba lei ne’ebé ita prodús ne’e para ita atu serbí ita-nia knaar sai di’ak liu, maibé ita fó tiha ba ita-nia asesór ida mak halo interpreta tuir tiha nia hanoin satán asesór mai husi nasaun sira avansadu ona ne’e ita susar tebes atu to’o bá iha ne’ebá, ema to’o bá iha ne’ebá presiza tinan hira, ita foin tinan 15 tanba ne’e presiza tebes reforsa institusionalmente lei ne’e para sai matadalan ba ita, maibé lei ne’e rasik tenke garante ita-nia implementasaun serbisu ne’ebé ita haknaar aan ba”.

Hatutan dalabarak dirijente sira la brani foti desizaun no entrega tomak ba ministru mak hola, ne’e signifika laiha kbiit atu lidera unidade, diresaun ida ho di’ak tanba korajen atu foti desizaun tauk.

“Tanba ne’e mak prioridade sira ne’ebé ita presiza halo reforma administrativa ne’e xave importante tebes no reforma ita-nia pensamentu atubele alkansa objetivu”.

Reforma institusionál, fiskál, aprovizionamentu no administrativa no reforma aan labele para nune’e ministru enkoraja atu hadi’ak MT hodi tau interese nasionál aas liu interese indivíduu, família no partidu.

Jornalista: Maria Auxiliadora

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here