Prokuradór Jerál Repúblika (PJR), José da Costa Ximenes.

DILI, (TATOLI) – Prokuradór Jerál Repúblika (PJR), José da Costa Ximenes, informa ba Prezidente Repúblika, Francisco Guterres Lú Olo, katak sira prepara ona karta ida ba Prezidente Parlamentu Nasionál (PN) atu bele presta informasaun anuál Prokuradoria Jerál Repúblika ninian.

Nia esplika informasaun anuál ne’ebé sei hato’o ba PN kona-ba serbisu sira ne’ebé Ministériu Públiku halo iha tinan ne’e nia laran.

“Agora dadauk Prezidente Parlamentu Nasionál fó ona resposta mai katak hafoin eleisaun maka Prokuradoria Jerál Repúblika bele halo aprezentasaun kona-ba informasaun anuál ba iha Parlamentu Nasionál”, Ximenes hato’o ba jornalista sira iha Palásiu Prezidente Nicolau Lobato, Bairru Pité, tersa ne’e, hafoin enkontru ho Xefe Estadu.

José Ximenes mós hato’o ba PR kona-ba produsaun livru ida relativamente enkontru ho Prokuradór Jerál Komunidade Nasaun Ko’alia Lian Portugés (CPLP-sigla portugés) iha Dili ne’ebé hala’o iha 25-27 Outubru 2017.

Prokuradór Jerál hatutan, nia mós hato’o kona-ba konvite hosi Rejiaun Espesiál Macau dirije ba Prokuradór Jerál Repúblika atu partisipa reuniaun kona-ba serbisu Ministériu Públiku nian atu hametin lasu kooperasaun entre Timor-Leste ho Macau.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here