ParPol sira hatudu sinal dame liuhosi bulaun hafoin atividade iha salaun Ministériu Solidaridade no Sosiál iha Kaikoli, ohin. Foto Tatoli/Agapito dos Santos

DILI, (TATOLI) – Ministru Defesa no Seguransa, ohin realiza sorumutu nasionál  ho Partidu Polítiku  (ParPol) no partidu koligasaun sira atu prevene konflitu hodi garante dame no estabilidade durante eleisaun antesipada.

Sorumutu ho topíku prevensaun ba violénsia eleitorál partisipa hosi Partidu Esperansa Pátria (PEP), Partidu Demokrátiku (PD), Partidu Repúblikanu (PR), Frente Revolusionária Timor-Leste Independente (FRETILIN), Movimentu Sosiál Demokrata (MSD), Movimentu Dezenvolvimentu Nasionál (MDN), Frente Dezenvolvimentu Demokrátiku (FDD) no Aliansa Mudansa ba Progresu (AMP) la marka prezensa iha sorumutu iha salaun Ministériu Solidaridade no Sosiál (MSS), Kaikoli.

Ministru Agostinho Sequeira Somotxo, hateten sorumutu ne’e hodi fó atensaun ba ParPol hodi prevene konflitu, violasaun  eleitorál, polítika fahe osan no seluktán.

Kontribuisaun hosi lider ParPol importante hodi prevene konflitu. “Bainhira polítiku la kontribui konserteza sei fó impaktu ba seguransaʺ, dehan Ministru.

Governante mós hateten sidadaun iha obrigasaun fó apoiu ba Polísia Nasionál Timor-Leste no FALINTIL-Forsa Defesa Timor-Leste (F-FDTL) hodi mantein dame no estabilidade.

ʺEdukasaun sivika ba sidadaun importante no sidadaun ida-idak tenke hatene dever no obrigasaun atu kontribui ba pás bainhira partisipa iha kampañaʺ, hateten Somotxo.

Oradór sira iha sorumutu nasionál ne’e hosi parte Komisaun Nasionál ba Eleisaun (CNE-sigla portugés), PNTL, parte Igreja no Fundasaun Alola ne’ebé aprejenta ida-idak nia papel hodi fó kontribuisaun ba EA.

Sei Asina Paktu Unidade 

Entretantu Vise Presidente CNE, Duarte Tilman Soares, hateten iha loron 7 abril, ParPol sira sei asina paktu unidade hodi garante pSs no estabilidade durante periodu kampaña to’o eleisaun antesipada iha 12 maiu.

ʺPaktu unidade nasionál ne’e sei hala’o iha loron 7 iha salaun CNE no sei taka ho diskursu ikus hosi Prezidente Repúblika, Francisco Guterres Lú Olo, ba partidu polítiku siraʺ, dehan nia ba jornalista sira iha salaun MSS Kaikoli, ohin.

Paktu ne’e hanesan meiu atu regula ParPol sira atu mantein dame no estabilidade. ʺPartidu polítiku sira atu promete no kumpri durante periodu kampaña no eleisaun to’o publikasaun rezultadu atu la’o ho pás no hakmatekʺ, tenik.

Maibé nia iha konfiansa boot ba ParPol sira hodi sei garante pás no estabilidade hodi fó susesu ba EA.

ʺIta konfia nafatin ba partidu polítiku sira tanba sira mós ema timoroan hotu  ne’ebé sira sei garante simpatizante, militante sira sei la halo krime hodi hakat ba festa demokrásiaʺ, garante tan.

Tuir oráriu kampaña ba ParPol sei komesa iha loron 10 abril 2018 no termina iha loron 9 maiu.

Jornalista: Agapito dos Santos

Editora: Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here