DILI, (TATOLI) – Koordenadór Organizasaun Nasoens Unida (ONU) no Reprezentativu United Nations Development Programme (UNDP) iha Timor-Leste, Hemansu-Roy Trivedy, horisehik aprezenta ona ninia karta kredensiál ba Ministru Negósiu Estranjéiru no Kooperasaun, Aurélio Guterres, iha sira nia enkontru dahuluk.
Tuir nota komunikadu ne’ebé Tatoli simu haktuir enkontru ne’e, Ministru Aurélio espressa ninia esperansa hodi kontinua hametin kooperasaun entre governu Timor-Leste no sistema ONU nian.
Nune’e, Trivedy simu ho di’ak oportunidade ne’e atu servisu ho governu no ema timoroan atu hetan proridade dezenvolvimentu ba nasaun, inklui hetan objetivu dezenvolvimentu sustentavel, planu estretejia dezenvolvimentu hanesan kompromisu internasionál no rejionál.
Alende ne’e, nia mós hato’o ninia apresiasaun ba sistema ONU ba governu TL no garante ba Ministru Aurélio katak ekipa nasaun iha ONU sei hametin kolaborasaun ho governu no parseiru seluk atu infrenta dezafiu iha dezenvolvimentu nasionál no lokál.
Antes nomeasaun hanesan Koordenadór ONU iha Timor-Leste, Trivedy, sai ona hanesan Koordenadór ONU no Reprezentativu UNDP iha Papua Nova Guinea iha dezembru 2013 to’o 2017.
Antes ne’e nia servisu hanesan servente sivíl senior iha departementu ba dezenvolvimentu iha UK husi tinan 2000 to’o 2013. Nia hamutuk Department for International Development (DFID) hafoin tinan 20 nia laran servisu ba organizasaun noun govermental iha UK, Mosambique, India and Malawi.
Koordenadór ONU hanesan funsionáriu ONU ho kargu aas liu iha nasaun ida. Funsaun Koordenadór iha ONU hanesan sentrál hodi hetan susesu husi sistema ONU atu suporta governu aselera progresu ne’ebé hetan husi objetivu dezenvolvimentu sustentavel.
Koordenadór ninia funsaun xave mak asegura koordenasaun, harmonizasaun no realsa efetividade husi suporta ONU atu ajuda hetan prioridade dezenvolvimentu, hanesan prepara no hatan ba emerjénsia.
Jornalista: Julia Chatarina
Editora: Rita Almeida
