Xefe Suku Timor Laran Sei Vizita ZEESM

0
325
Mapa Oekusi. Foto espesiál

VIQUEQUE (TATOLI)–Governu liuhusi Ministériu Estatál sei konvida xefe suku sira iha Timor laran tomak atu vizita Rejiaun Administrativu Espesiál Oe-Cusse Ambenu (RAEOA) iha tempu besik.

Primeiru Ministru, Marí Alkatiri deklara asuntu ne’e liuhusi Konsultasaun Programa Sétimu Governu Konstitusionál iha edifísiu Administrasaun Munisípiu Viqueque, Kinta ne’e, hafoin responde autoridade lokál sira nia preokupasaun kona-ba dezenvolvimentu iha sira nia munisípiu hakdasak liu kompara ho Oe-Cusse.

Objetivu vizita Oe-Cusse, Xefe Governu esplika, atu observa direta progresu dezenvolvimentu Zona Espesiál Ekonomia Sosiál Merkadu (ZEESM).

“Xefe suku sira bele hetan referénsia ruma hosi dezenvolvimentu Oe-Cusse, nune’e sira dezenvolve sira nia munisípiu bainhira akontese transferénsia podér ba munisípiu iha tempu oin mai,” Marí esplika.

Autoridade lokál sira hosi Munisípiu Viqueque husu Governu atu aplika mós ZEESM iha Viqueque no munisípiu sira seluk.

Primeiru Ministru hatán, ZEESM ne’e ba de’it zona espesiál ne’ebé dook hosi munisípiu 12 hanesan Oe-Cusse, maibé modelu dezenvolvimentu ZEESM ne’e bele habelar ba munisípiu sira seluk iha Timor laran.

“Depende Governu foun ne’ebé mai. Karik FRETILIN manán iha eleisaun antesipada 12 Maiu mai ne’e, sei aplika Polu Dezenvolvimentu iha munisípiu 12 ho nia referénsia maka Oe-Cusse,” Marí esklarese.

(Jornalista: Xisto Freitas)

(Editór : Manuel Pinto)

HUSIK IDA HATÁN