Xanana : “Funu seidauk Hotu”

0
411
Xefe Negosiador Prinsipál Fronteira Marítima, Kay Rala Xanana Gusmão.

DILI (TATOLI)– Xefe Negosiador Prinsipál Fronteira Marítima, Kay Rala Xanana Gusmão, afirma Timor-Leste iha ona nia fronteira Marítima, maibé funu seidauk hotu. Nia husu atu Timoroan hotu tenke ka’er metin riku soin Timor nian.

“Ba ita nia esforsu, ba ita nia kbiit. Funu seidauk hotu, fronteira iha tiha ona, maibé funu seidauk hotu. Ita tenke ka’er metin ita nia riku soin, hodi kontinua luta,” Kay Rala Xanana Gusmão fó sai liuhosi nia intervensaun iha sede Partidu CNRT, Bairru Sentrál, ohin.

Xanana dehan istória funu Timor hatudu ona katak timoroan nunka rende atu defende nia soberanu, tanba ne’e nia fiar katak, sedu ou tarde Timor sei manan nia riku soin.

“La bele husik ema hadau hosi ita nia liman riku soin ne’e,” Xanana enkoraja. Hodi dehan, “Ba Timor foin tinan sanulu resin neen, haree didi’ak, tuur hamatek ho laran malirin no ulun malirin, Ita dehan di’ak tebes. Di’ak tebes, tanbasá, tanba provoka Ita atu komprende saida mak konstrusaun estadu, saida mak valores demokrasia nian, saida mak konstituisaun.”

Maski Timor foin hahú iha faze konstrusaun estadu, Timor-Leste, iha maturidade no matenek se kompara ho nasaun barak ne’ebé riku mineiru no ukun an tinan barak, maibé la iha estabilidade.

Tan ne’e, ba vitória ne’ebé ohin loron Timor-Leste hetan iha luta hasoru nasaun viziñu Australia, Xanana la haluha  hato’o agradesimentu ba parte hotu ne’ebé durante ne’e fó suporta, material tantu moral nian, hodi hasoru Australia, liu-liu parte igreja nian, ne’ebé reza barak ba kazu ne’e.

Nu’udar sinál obrigadu ida mós, Xanana informa ona ba iha Prezidente da Repúblika, Francisco Guterres Lú Olo atu fó rekoñesementu ba advogadu Internasionál, inklui Timoroan ne’ebé durante ne’e partisipa ativu iha ekipa luta kontra Austrália hodi defende Fronteira Marítima.

Kona ba esplikasaun detalladu ba kazu Fronteira Marítima, ne’ebé durante fulan neen, Xanana defende iha estranjeiru, Nia promete katak sei arranja tempu oportunu ida hodi halo esplikasaun ba mídia nasionál no internasionál iha Timor-Leste.

“Ha’u husu deskulpa ba jornalista sira no públiku, difisil tebe-tebes  atu esplika Great Sunrise (GS) ba imi, ha’u sei buka tempu ida, ha’u prepara didi’ak aprezentasaun ida para ajuda imi kompriende,” Xanana promete.

Jornalista : Zezito Silva

Editór : Manuel Pinto  

HUSIK IDA HATÁN