Xanana Aban Fila Mai Dili

0
785

DILI (TATOLI)—Prezidente Partidu Libertasaun Popular-PLP, Taur Matan Ruak, informa ba Timoroan tomak katak, Xefe Negosiador Prinsipál Fronteira Marítima, Xanana Gusmão, informa ba ona ba nia (Taur) katak, aban Xanana fila hikas mai Dili, Timor-Lorosa’e.

Eis Prezidente Republika, Taur Matan Ruak, iha seminariu ba loron veteranu sira iha Sentru Konvensaun Dili. Foto Egas Cristovao

“Ha’u husu ba AMP (Aliansa Mudansa ba Progresu) aban (Domingu) ba simu ita nia maun boot Xanana,” Porta Vóz AMP, Taur Matan Ruak informa iha sede PLP, Metiaut bainhira simu vizita hosi militante CASDT, Ohin.

Taur mós apela ba povu Timor Lorosa’e atu sente laran kmanán bele hakbesik an ba iha aero portu Nikolau Lobato, aban, iha tuku 1H30 hodi simu lider nasionál, Kay Rala Xanana Gusmão.

“Husu ba hotu-hotu ne’ebé isin kaman bele hakat ba simu ita nia maun, Ita boot sira sei hanesan AMP,” eis Jeneral ne’e apela.

Hodi kontinua dehan, “la presiza lori atributu ba simu, tan seidauk kampaíña.”

Kay Rala Xanana Gusmão nu’udar Xefe Negosiador Prinsipál ba ekipa Fronteira Marítima, ne’ebé simu knaar hosi sestu governu, liuhosi rezolusaun governu ne’ebé hasai iha  loron 3 Fevereiru 2016, hodi lidera ekipa negosiasaun Fronteira Marítima, hasoru nasaun Australia. Ho hanoin atu dignifika no tane As soberania ho integridade nasionál.

Tuir informasaun hosi komisaun ida nee kompostu husi Jovens independente no voluntáriu informa katak route atu simu Xanana Gusmão sei hahú husi aeroportu Nicolau Lobato ba to’o iha Xanana nia rezidénsia Bidau Lesidere. Tanba ne’e, husu komunidade hotu atu hamriik iha estrada ba simu Xanana hodi hatudu apresiasaun ba rezultadu hotu ne’ebé mak Timor- Leste atinje ona, liuhosi Xanana Gusmão nia luta durante fulan neen iha estranjeiru.

Komisaun mós konvida povu no komunidade Timor Lorosa’e, espesiál ba Dili, atu hola parte iha marsha ba unidade Nasionál, Interese Nasionál no Konsensu Nasionál.

Entretantu komisaun ida nee kompostu husi Jovens independente no voluntáriu, nia porta vóz mak Leovigildo Hornai, eis sekretáriu estadu juventude desportu.

“Agora ami prepara konsolida ho suku no bairru sira,” Leovigildo Hornai informa.

Jornalista : Agapito dos Santo

Editór : Manuel Pinto

HUSIK IDA HATÁN