Veteranu Sira Tenki Tulun Jerasaun Foun atu Komprede Espíritu Serbisu

0
111

DILI, (TATOLI) – Prezidente Repúblika, Francisco Guterres Lú Olo, husu ba veteranu sira-nia kontribuisaun hodi tulun jerasaun foun sira atu komprende espíritu serbisu ba komunidade no espíritu serbisu ba nasaun, nune’e bele hakat lailais liu-tán ba dezenvolvimentu nasionál.

“Ita tenke hakat ba oin ho urjente hodi hatutan valór lubuk ida ba jerasaun foun sira, hanesan valór Estadu ida ne’ebé moos, valór dedikasaun ba estudu no serbisu hodi harii futuru ida ne’ebé di’ak”,  Xefe Estadu hato’o lia menon ne’e liuhusi ninia deskursu ba komemorasaun Loron Nasionál Veteranu ba dahuluk ne’ebé hala’o iha Palásiu Governu, Dili, sábadu dadér ohin.

Nia dehan dezenvolvimentu nasaun nian presiza sidadaun sira-nia dedikasaun, inklui veteranu sira-nian, no presiza mós espíritu serbisu.

“Rekoñesimentu ne’ebé mak Nasaun fó ba veteranu sira hasa’e veteranu sira-nia responsabilidade iha Nasaun nia oin”, katak tan.

Iha biban ne’e, Prezidente Repúblika afirma defende dezenvolvimentu ekonómiku no dezenvolvimentu emprezariál, maibé dezenvolvimentu setór privadu nian ezije kompeténsia téknika no ezije mós valór morál sira-ne’ebé metin.

Lahó valores, tuir nia, sei loke odamatan ba korrupsaun no halakon konfiansa sidadaun sira-nian iha instituisaun nasionál sira, signifika nega buat hotu ne’ebé mak rezisténsia no determinasaun povu nian lori mai nasaun liuhosi Restaurasaun Independénsia.

“Ha’u husu boot ba veteranu sira no sidadaun hotu-hotu atu fó kontribuisaun boot ba objetivu hirak-ne’e”, apela.

Nia mós apela tan ba Nasaun tomak, liu-liu ba Ministériu Edukasaun no Kultura, Juventude, Defeza no Seguransa, no Universidade sira – ba entidade sira-ne’ebé maka soi responsabilidade ba jerasaun foun sira atu dezenvolve inisiativa no kria planu asaun hodi promove veteranu sira-nia partisipasaun – no hatutan valores ba jerasaun foun sira, mak hanesan serbisu ba povu, interese nasionál, empeñu no sakrifísiu.

Jornalista: Xisto Freitas

Editora: Rita Almeida

HUSIK IDA HATÁN