Veteranu Sira-nia Hanoin Kona-ba Akordu Ketan Tasi

0
70
Veteranu sira. Foto dokumentasaun: La'o Hamutuk

DILI, (TATOLI) – Veteranu no eis-kombatente libertasaun nasionál konsidera akordu ketan tasi (fronteira marítima) entre Austrália no Timor-Leste nu’udar vitória ba Nasaun ne’e maske kontinua ejize atu ratifika.

Veteranu no eis-kombatente libertasaun nasionál, Cornelio Gama L7 hateten durante funu to’o ohin loron veteranu sira-nia hakarak mak povu nia moris di’ak.

“24 anos funu buat hotu ne’ebé ami hakarak mak povu moris di’ak, luta ne’e buat ne’ebé ita halo hotu, ko’alia fronteira marítima entre Austrália ho Timor-Leste ho fuan boot, laran di’ak, la odiu hodi ko’alia, rezolve problema. La iha problema ida, la lori buat meik ida, maibé iha liafuan di’ak ida entre ita ho Austrália, ne’e hanesan família ida”, dehan L7 iha edifísiu La’o Hamutuk ba jornalista sira, kuarta ne’e.

Asina fronteira marítima entre Austrália reprezenta husi Ministra Negósiu Estranjeiru Austrália nian, Julia Bishop no Timor-Leste reprezenta husi Adjuntu Primeiru-ministru ba Delimitasaun Fronteira Marítima, Hermenegildo Pereira, nu’udar vitória ida ba Timor-Leste.

“Rezultadu ida ne’e di’ak liu ba povu Timor-Leste; joven sira tuur hakmatek bainhira serbisu iha, kaer rikusoin atu bele jere nasaun ne’e hodi lori dezenvolvimentu”, akresenta L7.

Ba oin Nasaun atu sai di’ak, jere osan didi’ak atu labele estraga nar-naran maibé oinsá povu bele kontente.

“Loke tan buat hothotu, povu sira ne’ebé estrada seidauk to’o buka meius para sira mós kontente”, akresenta tan.

Nune’e mós, Eis-asistente polítika rejiaun IV, António Batista Alves Hamar, konsidera akordu ne’e nu’udar faze dahuluk ninian

“Nu’udar jerasaun foun ne’ebé hola parte mós iha rezisténsia nia laran apela ba governu nomós Parlamentu Nasionál Timor-Leste nian ao mesmo tempu apela mós ba governu no Parlamentu Nasionál Austrália atu ratifika lalais akordu ne’e iha tempu badak sein kondisaun”, ejize veteranu ne’e.

“Hakarak ka lakohi ida ne’e hanesan ejizénsia veteranu sira nian, povu Timor tomak, presiza ratifika lalais akordu ne’e para bele sai ona hanesan prosesu normál ba kontrolu fronteira marítima i ao mesmo tempu bele mós haree ona kondisaun saida mak estadu Timor-Leste bele halo, haree ba esplorasaun mina no rekursu naturál sira ne’ebé mak iha tasi laran”.

Hamar realsa momentu ne’e parte ida husi povu nia hakarak no mehi no nasaun hein. “Iha futuru ita fiar katak ho akordu ida ne’e bele loke mós dalan entre ita ho estadu Indonézia ne’ebé sei iha mós fronteira ne’ebé mak seidauk define, prinsipalmente tasi”.

Nia afirma governu Austrália ho laran luak loke ona dalan ba komunidade internasionál prinsipalmente loke mós dalan ba governu Indonézia atu bele mós fó ona, loke ona dalan atu bele negósia liña fronteira.

Timor-Leste presiza halo kumpleta ninia soberania, tantu aero [lalehan], tasi. Soberania terestre hetan ona, hatene katak sei iha fronteira, problema oituan iha Naktuka, presiza haree.

Foin dadaun, governu ko’alia ona, tempu badak governu Indonézia no Timor-Leste bele rezolve fronteira terestre ninian.

Veterana, Ana Senhorinha Alves da Silva Bilessa, orgullu ho asinatura ne’ebé lidera husi xefe Negosiadór Delimitasaun Fronteira, Kay Rala Xanana Gusmão ho nia ekipa.

“Hanesan esperiénsia ne’ebé ami aprende durante 24 anos, objetivu mós mak ida ne’e [fronteira marítima-red], misaun veteranu seidauk hotu, entaun ohin loron, ami hakarak apoiu tan maun-boot Xanana to’o halo nusa mak direitu povu Timor-Leste ninian alkansa”, dehan eis-asistente polítika rejiaun II.

Bilesa reforsa povu tenke iha duni fronteira marítima ida nune’e ho akordu asinatura ne’e iha futuru povu sei di’ak.

“Entaun ida ne’e mak veteranu sei luta tan dala ida para ita manan, hanesan maun-boot Xanana nia prezensa, esforsu ne’e di’ak, entaun ita garante povu Timor-Leste moris sei di’ak, futuru sei di’ak”, garante.

Jornalista: Rafy Belo

Editora: Rita Almeida

HUSIK IDA HATÁN