UNTL-UNITAL Sai Alvu Ba Projetu Mekanizmu Auto Regulasaun KomSos

0
82
Prezidente Konsellu Imprensa, Virgilio Guterres. Dokumentasaun Tatoli

DILI, (TATOLI) – Prezidente Konsellu Imprensa (CI-sigla portugués), Virgilio Guterres, afirma Universidade Nasionál Timor-Leste (UNTL) ho Universidade Orientál Timor-Leste (UNITAL) sai alvu ba projetu mekanizmu auto regulasaun ba komunikasaun sosiál iha Timor-Leste.

“Projetu ne’e ami involve universidade rua mak Universidade Nasionál Timor-Leste no Universidade Orientál Timor-Leste (UNITAL) tanba ita nia rai úniku universidade rua mak iha departamentu Komunikasaun Sosiál, nune’e sira sai tarjetu (alvu) oinsá atu hasa’e sira nia koñesimentu”, Virgilio Guterres ba jornalista sira iha El-Legendario hafoin serimónia lansamentu ba projetu ne’ebé hanaran hametin mekanizmu auto regulasaun ba komunikasaun sosiál iha Timor-Leste, tersa, (13/3).

Projetu ne’e sei foku liu programa kapasitasaun katak oinsá mak hasa’e koñesimentu estudante departamentu komunikasaun sosiál iha universidade rua liuhosi responsabilidade sosiál iha área professionál jornalizmu nian, oinsá KI atu halo komunikasaun ho órgaun KI iha rejiaun sudeste aziátiku atu bele tuir programa sira iha ne’ebá no seluk tán.

Projetu ne’e hala’o depois tinan kotuk bainhira KI partisipa komemorasaun loron mundiál liberdade imprensa nian iha Jakarta no asina kedan kona-ba kooperasaun.

Kooperasaun ne’e ho fundu hosi Embaixada Olanda ba tinan tolu, tanba ne’e iha janeiru fulan hirak liu ba KI enkontru ho parseiru sira hodi husu opiniaun saida mak projetu ne’e bele identifikadu hodi ezekuta.

Iha parte seluk, Governu liuhosi Sekretariu Estadu Konsellu Ministru no Komunikasaun Sosiál, Matias Boavida, akresenta polítika governu hakarak apoiu nafatin órgaun komunikasaun sosiál, nune’e bele haburas demokrásia iha Timor-Leste.

Jornalista: Zezito Silva

Editora: Rita Almeida

HUSIK IDA HATÁN