UNITAL Konvida Embaixadór Portugal Ko’alia Kona-ba Polítika Esterna

0
76

DILI, (TATOLI) – Universidade Orientál Timor Lorosa’e (UNITAL) konvida embaixadór Portugal iha Timor-Leste (TL), José Pedro, hodi ko’alia kona-ba polítika esterna Portugal ba estudante sira.

Reitór UNITAL, Roberto Seixas Miranda, ba jornalista sira, ohin, iha Kampus UNITAL, Bekora katak relasaun entre rai rua antes, durante intervensionizmu no to’o agora importante ba estudante sira ne’ebé mak estuda relasaun internasionál, siénsia polítika nomós direitu.

“Tanba ne’e ami konvida embaixadór Portugal mai ko’alia uitoan kona-ba relasaun Portugal iha Timor-Leste, porque istória ne’e naruk; durante ukun portugés iha Timor, depois Timor ho Portugal luta hamutuk “lado a lado” depois hetan indepedénsia, nomós ohin loron”, dehan Roberto Seixas. “Se la iha Portugal, la hatene ohin loron ita bele ukun aan ka la’e”.

Nia haktuir Portugal asume responsabilidade tanba nu’udar administrante. Tanba antes konsulta populár 30 agustu 1999, Portugal ho Indonézia asina akordu iha Sekretáriu Jerál Organizasaun Nasoen Unida nia oin ho naran 5 de maiu.

“Ida ne’e mak akontese, importante la halimar. Estudante sira ne’ebé mak estuda relasaun internasionál, estuda direitu, estuda ekonomia, presiza hatene”, salienta akadémiku ne’e.

Embaixadór Portugal, José Pedro Machado, konsidera palestra ne’ebé UNITAL organiza importante. “Estudante ba futuru nasaun, ne’e oportunidade importante tebes, agradável hodi diskute asuntu polítiku, diplomátiku ba joven nasaun ne’e”, akresenta embaixadór Portugal, José Pedro.

Entretantu, palestra ne’ebé UNITAL organiza responsabiliza husi Fakuldade Siénsia Sosiál no Polítika (Sispol) no hetan partisipasaun husi estudante sira seluk hosi Universidade Díli (UNDIL), Universidade Paz (UNPAZ), ensinu superiór seluk inklui konvidadu sira seluk.

Jornalista: Rafy Belo

Editora: Rita Almeida

HUSIK IDA HATÁN