UNICEF Apoia Eskola Foun iha Ainaro no Maubisse

0
103

DILI, (TATOLI) – Fundu hosi Nasoen Unida ba Labarik Sira (UNICEF-sigla inglés) suporta edifísiu eskola foun iha Ainaro no Maubisse atu labarik sira bele hetan ambiente estudau ne’ebé di’ak liután.

Edifísiu eskola foun ne’e, hanesan haktuir iha nota komunikadu, sei fó benifísiu ba estudante 615 iha Eskola Bázika Sentrál, Lemos Pereira de Almeida, Soro iha Ainaro no estudante 145 estudante iha eskola Horaiquot Eskola Bázika Filiál iha Maubisse.

Kada edifísiu eskola foun ne’e iha aula tolu, espasu ba profesór sira, biblioteka, haris fatin ketak ba mane, feto no difisiente.

Alende ne’e, eskola ne’e iha asesu bee moos ba komunidade hanesan parte husi programa sanitasaun UNICEF nian.

Nune’e mós fó apóiu tékniku ba formasaun profesór sira no estabelese asosiasaun parente-profess’or no konsellu estudante.

Reprezentante UNICEF iha Timor-Leste, Scott Whoolery, hateten konstrusaun edifísiu foun ne’e hanesan apóiu husi organizasaun Nasoens Unida ne’e ba Governu Timor-Leste atu fó ambiente estuda di’ak ba labarik sira.

“Nune’e UNICEF sei servisu nafatin ho Ministériu Edukasaun no Kultura atu aumenta kapasidade profesór sira hodi halo edukasaun bele hetan asesu inklusivu ba labarik sira, tantu feto no mane”, tenik.

Tuir nia, antes ne’e UNICEF halo ona  konstrusaun no reabilitasaun ba edifísiu eskola hanesan parte ida suporta organizasaun ne’e ba Governu hodi fó esperiónsia edukasaun di’ak ba labarik sira.

Eskola rua ne’e hetan apoiu desde 2016 hafoin liu prosesu negosiasaun no garante husi unidade infraestrutura Ministériu Edukasaun no Kultura, finalmente konstrusaun no reabilitasaun edifísiu eskola foun rua ne’e remata iha 2017 no totál orsamentu US$358.000.

Entretantu Vise Ministru Edukasaun no Kultura, José Neves, halo inagurasaun iha kuarta ne’e akompaña husi Administradór Ainaro, Albertino de Araújo, Scott Whoolery, profesór no estudante sira nomós komunidade.

Jornalista: Julia Chatarina

Editora: Rita Almeida

HUSIK IDA HATÁN