Turizmu Aventura Sei Lori Ema Deskobre Fatin Ne’ebé Seidauk Bá

0
116
Ministru Turizmu, Manuel Vong partisipa iha konferénsia imprensa iha Sentru Informasaun Turístika, Bidau-Lesidere hamutuk ho Diretór Jerál MT, José Dias Quintas, no aventureiru timoroan, Boy Sabak.

DILI, (TATOLI)-Ministru Turizmu, Manuel Vong, apresia inisitiva aventureiru, Atanásio Viana, hodi halo aventura hale’u Timór.

Tuir Vong turizmu aventura ba Timor-Leste hanesan atividade turístika ida ne’ebé lori ema hakarak deskobre fatin hirak ne’ebé maka ema labele bá.

Nune’e mos tipu turístika aventura sei fó perspetiva, vizaun foun bainhira hala’o viajen. Ho ida ne’e aventureiru, Atanásio Viana, nia atividade sei atrai aventureiru barak atu vizita Timor.

“Ha’u admira tebes ho nia inisiativa iha 2014 halo ona depois iha 2015, no 2018 agora halo tan, signifika katak atividade ida ne’e sei dada ema barak liután, aventureiru barak no bele dada turista aventura sira atu mai halo viajen ou vizita iha ita-nia rai no halo atividade turístika ida ne’e”, Vong hatete iha koferénsia imprensa iha Sentru Informasaun Turístika, Bidau-Lesidere, ohin, relasiona ho atividade aventura ne’ebé sei hala’o husi Atanásio iha loron 24-25 marsu ne’e.

Nune’e Ministériu Turizmu (MT) fó apresiasaun boot ba eventu ida ne’e no apoiu ba inisiativa ida ne’e no hein katak sei iha inisiativa sira seluk mak mai husi joven ou grupu sira ne’ebé gosta halo atividade turístika aventureira.

“Turizmu aventura sira ne’e la’ós de’it iha rai, maibé mós iha tasi. Ita uluk iha mós belun ida husi Portugál ne’ebé maka nani husi Ataúru mai to’o Dili no ida ne’e ita seidauk halo filafali. Ita hein katak aban-bainrua sei iha tan mós aventureiru foun atubele halo atividade nani husi Dili bá Ataúru, no sei bele sai hanesan kompetisaun ida bá iha futuru”.

Viajen ida ne’e bele mós promove fatin turístiku sira hodi halo promosaun Timor-Leste hanesan destinu turístiku ida ne’ebé mak atrai ema.

Vong hatutan iha tempu badak sei halo mós lansamentu ba vizita Timor-Leste vinte e trinta hanesan atividade ida mós ne’ebé oferese produtu turístiku ida ne’ebé bele fa’an turizmu aventura uza motór.

“Ita iha Tour de Timor ne’ebé uza bisikleta fó volta Timór, agora ita iha tan motorizada, hein katak loron ida mós aventura ho karreta no aventura la’o ain ne’ebé sei fó volta Timor-Leste”.

Atanásio Viana ne’ebé bolu Boy Sabak sei halo atividade turizmu aventura hale’u Timór iha loron rua husi 24-25, maski haree ba kondisaun reál katak terrenu (estrada) Timór iha situasaun grave.

“Ida ne’e mak dezafiu (estrada) ne’ebé mak ha’u buka duni tanba esperiénsia barak ona no dezafiu ne’e mak motiva liután ha’u atubele liu”.

Atubele atinje nia alvu prinsipál katak hale’u Timór iha oras 24 nia laran maka Atanásio halo teste uluk ona ho deskobre dezafiu saida mak hetan iha terrenu ne’ebé hahú iha Janeiru liubá ho mota fó volta durante loron haat no daudaun sei hale’u durante loron rua antes ba to’o Maiu hodi halo atividade ida ne’e ho loron ida de’it.

Jornalista : Maria Auxiliadora

Editór : Manuel Pinto

HUSIK IDA HATÁN