TOMAK Prioritiza Hadi’ak Seguransa Ai-han no Dezenvolve Agrikultura Komersiál

0
145
Foto USAID

DILI, (TATOLI) – To’os ba Moris Di’ak (TOMAK) prioritiza atu hadi’ak seguransa ai-han no nutrisaun ba família agrikultór sira no suporta dezenvolvimentu agrikultura komersiál iha Timor-Leste ne’ebé mak implementa iha faze dahuluk iha suku 66 ne’ebé lokaliza iha munisípiu Baukau, Vikeke no Bobonaru.

Espesialista Korrente Valór (Value Chain), TOMAK, Joaninha Oliveira Guterres, hatete komponente seguransa ai-han no nutrisaun ne’e halo parseria ho Ministériu Saúde (MS) no Organizasaun Naun Governamentál (ONG) ne’ebé serbisu hamutuk ho komunidade no iha parte agrikultura komersiál ne’e koopera ho Ministériu Agrikultura no Peska (MAP) no Institutu Apoiu ba Dezenvolvimentu Emprezariál (IADE) nomós setór privadu sira.

“Tanba iha Ministériu Agrikultura haree ba parte produsaun nian oinsá atu apoiu tékniku imediata atu hasa’e rendimentu to’os-na’in nian no husi negósiu ita servisu hamutuk ho IADE atu kapasita to’os-na’in oinsá sira bele prodús nomós fa’an”, Joaninha hatete iha Komoro, ohin.

Liuhusi kooperasaun entre TOMAK ho MAP halo ona levantamentu ba produtu agríkola ne’ebé iha poténsia ba merkadu. “Iha faze inísiu nian ita hahú ho fore-mungu, fore-rai, liis-mean no hare-mean no bá oin atu haree tan ba temperus no ai-fuan”.

Área intervensaun TOMAK nian ba daudaun ne’e sei iha munsípiu tolu tanba konsulta ho parte Governu no liga ba prioridade rua TOMAK nian nomós serbisu ho ONG lokál katak área sira ne’e mak konsidera afeta ba problema má nutrisaun, nune’e faze dahuluk iha fatin tolu ne’e, maibé sei iha faze tuirmai iha posibilidade atu habelar ba munisípiu seluk.

Rezultadu husi levantamentu dadus hatudu iha munsípiu tolu ne’e haree ba poténsia kada munisípiu nian hanesan Bobonaru foka ba liis-mean, fore-mungu no fore-rai, Baukau haree liubá liis-mean, fore-rai no hare-mean no Vikeke hare-mean no fore-mungu.

Tanba programa TOMAK foin implementa iha 2016 nune’e faze inísiu halo aprosimasaun liuhusi estabelese demplots, serbisu hamutuk ho estensionista suku husi MAP no identifika to’os-na’in ne’ebé mak nia prodús nanis ona produtu agríkola ne’ebé temi.

Demplots mak fatin ki’ik ida atu aplika téknika ne’ebé aprende no iha ne’e agrikultor sira bele bá hamutuk fatin ne’e atu aprende tékniku ne’ebé fasilita husi estensionista liuhusi eskola kampu ba agrikultór, nune’e toos-na’in viziñu hotu bá fatin ne’e fahe esperiénsia no iha tempu kolleta mak haree rezultadu.

Iha parsela rua ne’ebé harii iha fatin ne’e mak prátika agrikultura di’ak no sistema baibain to’os-nain halo atu halo komparasaun no bainhira aprende hotu mak kompara ho sistema agrikultura tradisionál no iha momentu kolleta mak hatudu rezultadu ida ne’ebé di’ak liu maka tékniku ne’ebé sira aprende hamutuk ida ne’ebé di’ak maka sei kontinua ho ida ne’e no bá oin.

“Antes ne’e ami fasilita uluk estesionista sira, fó treinamentu hafoin ida ne’e hamutuk ho TOMAK kapasita fali to’os-na’in liuhusi demplots, ami halo aproximasaun liuhusi eskola ba kampu agrikultór. Entaun liuhusi prátika iha kampu maka oinsá fó apoiu tékniku hodi prodús liis ka fore-rai ho tékniku edukativu ne’ebé di’ak ne’ebé hanaran prátika agrikultura di’ak”.

Liuhusi estabelesimentu demplots ne’e kolleta ona produtu agríkola rua hanesan liis-mean no fore-mungu.

“Baibain to’os-na’in sira prodús liis liuhusi isin de’it, maibé ho intrevensaun tomak nian ita apoiu sira atu prodús liuhusi musan. Rezultadu liis nian di’ak no sira mós lori bá to’o iha supermerkadu tanba TOMAK nia objetivu ida mak liga to’os-na’in ho merkadu”.

Ho prezensa TOMAK nian maka ajuda ona to’os-na’in husi agrikultura subsisténsia ba komersializasaun, no iha parte nutrisaun buka atu rezolve problema ida ne’e no envolvimentu jéneru importante tebes atu foti desizasaun, liuliu feto hodi hadi’ak nutrisaun uma-laran nian.

Jornalista: Maria Auxiliadora

Editora: Rita Almeida

HUSIK IDA HATÁN