TL-Austrália Asina Ona Tratadu Ketan Tasi

0
185

DILI, (TATOLI) – Ministru Adjuntu Primeiru-Ministru ba Delimitasaun Fronteira, Agio Pereira reprejenta Estadu Timor-Leste no Ministra Negósiu Estrangeiru Austrália, Julie Bishop reprezenta Austrália asina ona tratadu ketan tasi (fronteira marítima) iha Kuartél Jerál Organizasaun Nasoen Unida, Novaiorke ho sasin mak Sekretáriu Jerál ONU, António Guterres no Prezidente Komisaun Konsiliasaun, Embaixadór Peter Taksøe-Jensen.

Iha intervensaun hafoin seremonia asinanatura, Julie Bishop hateten komisaun konsiliasaun hatudu tribunál internasionál bele rezolve disputa ho dame, hanesan ezemplu ida ba funsaun tribunál internasionál hotu atu rekoñese interese koletivu hanesan servisu krusiál ida husi komisaun  independente ida.

“Lori nasaun Austrália nia naran, ha’u agradese ba esforsu no dedikasaun durante ne’e ho independente no integridade liuhosi konsiliasaun ne’ebé Timor-Leste prepara hodi Austrália partisipa iha prosesu ne’e no ha’u hanesan ema ne’ebé envolve iha prosesu”, tenik liuhosi transmisaun webtv.un.org tuku 17.00 oras EUA no tuku 07.00 oras TL.

Hodi dehan tratadu ne’e hanesan kapítulu foun ba Nasaun rua tanba Austrália iha interese ba estabilidade no prósperu TL.

“Hanesan amigu di’ak no nasaun viziñu, ami hakarak Timor-Leste hetan potensiál ekonómiku tanba iha ligasaun istória no jeográfiku entre ema ho ema no sei kontinua to’o agora, nune’e ami sei kontinua fó suporta ba Timor-Leste nia ekonomia no dezenvolvimentu umanu”, katak.

Nune’e nia dehan tan, tratadu ne’e hanesan faze importante atu loke dalan dezenvolve rekursu iha kampu gás Greater Sunrise.

“Ami hatene rekursu ne’e importante tebes ba dezenvolvimentu Timor-Leste tanba sei lori benifísiu signifikante”.

Fatin hanesan, Agio Pereira iha ninia intervensaun agradese ba komisaun nia rekomendasaun sira ne’ebé hanesan servisu estraordináriu atu ajuda hetan konseitu iha diskusaun entre parte rua hodi hetan rezultadu di’ak.

“Agradese ba ekipa Komisaun Konsiliasaun ho sira nia expertu bele hakotu konsiliasaun husi parti rua ne’e”, tenik.

Nune’e mós kompromisu governu Australianu hatudu ba prosesu ne’e ho konstrutivu hodi fó posibilidade ba TL atu konklui tratadu iha tempu badak iha konsiliasaun.

Agradese mós ba Xefe Negosiadór Prinsipál, Kay Rala Xanana Gusmão, ba ninia matenek no lideransa.

Tratadu ne’e, governante ne’e akresenta sei estabelese rejime espesiál ba kampu gás Greater Sunrise no parte atu dezenvolve rekursu.

“Konkluzaun husi tratadu ne’e, klarifika loloos no responsabilidade Timor-leste no Austrália ba rekursu no atividade ho respektiva ba ami nia teritóriu soberanu”, afirma.

Asina tratadu ne’e, tuir nia hanesan kapítulu foun ba nasaun rua hanesan kolega di’ak no viziñu, tanba ne’e hein katak nasaun rua ne’e bele servisu hamutuk iha futuru.

Entretantu, seremónia ne’e partisipa husi delegasaun husi TL no Austrália, Ekipa Komisaun Konsiliasaun no negosiadór no reprezentante husi ONU. Xefe Negosiadór Prinsipál, Xanana Gusmão ne’ebé la marka prezensa iha seremónia importante ne’e.

Komisaun Konsiliasaun harii iha loron 25 juñu 2016 bazea ba aneksu V Konvensaun ne’ebé kompostu husi membru lima ho Prezidente Komisaun, Embaixadór Peter Taksøe-Jensen (Dinamarka) no membru seluk mak Rosalie Balkin (Austrália), Juiz Abdul GKoroma (Serra Leao), Profesór Donald McRae (Kanadá no Nova Zelándia) no Juiz Rüdiger Wolfrum (Alemaña).

Tuir akordu husi parte sira, Tribunál Permanente Arbitrajen (TPA) sei fó apoiu administrativu durante prosesu konsiliasaun. Enkontru durante ne’e entre diriji husi Komisaun Konsiliasaun tuir Konvensaun ONU kona-ba Lei Tasi nian no hetan apoiu husi TPA.

Jornalista: Julia Chatarina

Editora: Rita Almeida

HUSIK IDA HATÁN