Timor-Leste Hetan tan Direitu Soberania

0
217
Demonstrasaun kona-ba fronteira marítima. Dokumentasaun Lao Hamutuk

DILI, (TATOLI) – Organizasaun La’o Hamutuk konsidera asina akordu ketan tasi (fronteira marítima) entre Timor-Leste (TL) no Austrália ne’ebé sei hala’o iha Novaiorke, Estadu Unidu Amérika (EUA) nu’udar pasu ida ba Nasaun hodi hetan tan nia direitu ba soberania.

Asina akordu fronteira sei hala’o iha tuku 17.00 oras EUA no tuir oras TL, tuku 7.00 dader, loron 7 marsu 2018.

Peskizadór ONG Luta Hamutuk, Juvinal Dias

“Ami haree akordu ida ne’e pasu ida ba Timor-Leste hetan tan nia direitu soberania”, dehan peskizadór La’o Hamutuk, Juvinal Dias, ba TATOLI iha nia kna’ar fatin Bebora, ohin.

Movimentu Kontra Okupasaun Tasi Timor (MKOTT), organizasaun sosiedade sívil, ativista, estudante sira luta ida no hakarak atinji eh hetan soberania katak hetan ketan tasi ida ne’ebé permanente entre Timor-Leste ho Austrália. “Ida ne’e mak buat fundamentu”, reforsa.

“Ami hanoin husi La’o Hamutuk hanesan organizasaun ida ne’ebé mós prepara matéria barak, informasaun barak kona-ba lala’ok fronteira marítima, ami haree akordu ne’e hanesan vitória ida ba Timor-Leste”, afirma tan peskizadór ne’e.

Hanesan vitória tanba konsege konkista luta ida ho nasaun jigante ida, luta ne’e la’ós fásil. “Espesialmente ba kolega sira husi sosiedade sívil, luta ida ne’e naruk liu ba ami, hahú kedas iha 2002, 2004, ami hahú luta ida ne’e, hakarak fanu opiniaun públiku, opiniaun estadu, opiniaun Austrália no komunidade internasionál kona-ba diretu Timor-Leste nian”, refere.

Komemora Vitória

Organizasaun La’o Hamutuk sei komemora vitória iha sede La’o Hamutuk, Bebora, tuku 7.00 dader ho maneira simples tuir kapasidade organizasaun nian ba ema hotu.

“Halo reflesaun simples, ami konvida ema barak, ita-boot sira [jornalista] bele mai, ema barak, ema hotu bele mai, fatin ida ne’e [La’o Hamutuk] nakloke ba públiku, ita halibur iha ne’e, ita bele halo reflesaun oras ida, oras rua, pois ita bele fahe malu”, konvida.

Komemora vitória ne’e, peskizadór ne’e husu ema hotu partisipa, la’ós iha La’o Hamutuk de’it maibé bele mós husi sidadaun timoroan sira iha ne’ebé de’it, ho maneira ida-idak nian la presiza partidu ida mak lidera.

“Ami [La’o Hamtuk] lansa hela opiniaun ida ba públiku katak ita selebra hamutuk, selebra ho maneira ida-idak nian, ita la presiza partidu ida mak atu lidera, la presiza ema seluk lidera”, akresenta.

Hodi hatutan: “Ami-nia desizaun selebrasaun fora de interese partidu, ami organizasaun ne’ebé independente”.

La’o Hamutuk, hanesan Organizasaun Naun-Governmental (ONG) Timor-oan, ne’ebé servisu dezde 2000 atu monitór no analiza atividade sira husi ajénsia internasionál no governmentál iha Timor-Leste. Hodi hanoin katak dezenvolvimentu iha ne’e tenke responde ba povu nia nesesidade no povu nia hakarak.

Organizasun ne’e foka ba sistema no institusaun internasionál sira, atu proteje soberania ai-han no evita “malisan rekursu” iha Timor-Leste, ne’ebé depende makaas ba rendimentu petrolífeiru nomós atu hadi’ak liutan governasaun ne’ebe demokratiku no justisa.

Notísia relevente husi La’o Hamutuk;https://laohamutuk.blogspot.com/2018/03/ema-hotu-bele-mai-festa-ba-tratadu.html

Asina transmisaun direitu husi EUA, klik: http://webtv.un.org/

Jornalista: Rafy Belo

Editora: Rita Almeida

HUSIK IDA HATÁN