Temperatura Anuál no Nível Tasi-been Sa’e

0
148
Fórum seguransa alimentár durante loron tolu (28 fevereiru to’o 1-2 marsu, organizada husi UNTL ho SEARCA (Southeast Asian Regional Center for Graduate Study and Research in Agriculture). Foto: Mídia UNTL

DILI, (TATOLI) – Tuir diretór ba Alterasaun klimátika no Biodiversidade, Universidade Nasionál Timor Lorosa’e (UNTL), Adão Soares Barbosa, impaktu hosi mudansa klimátika halo tasi-been sa’e kada tinan.

“Hanesan temperatura anuál sa’e ona ba 0,016 graus-selsius no nível tasi-been sa’e ba 5,5 milimetru kada tinan”, haktuir profesór Adão Soares Barbosa, iha fórum ba seguransa alimentár ne’ebé hala’o iha Liseu, UNTL.

Situasaun ne’e, nia dehan sei afeta infra-estrutura sira ne’ebé mak besik tasi ninin no rai komunidade agrikultór sira nian ne’ebé besik tasi.

Mídia komunikasaun UNTL hatutan Barbosa katak iha rai-maran mós presiza terrás atu konserva rai-bokur maske mudansa klimátika ne’e akontese.

Tan ne’e, akadémiku ne’e husu ba komunidade agrikultór sira atu halo diversifikasaun ba plantasaun agrikola.

“Mudansa klimátika ne’e akontese resentemente bainhira mosu bain-loron naruk, klima udan makaas mosu inundasaun no rai-halai, to’o ikus afeta direita ba povu-agrikultór sira iha asuntu produsaun ai-han iha rai-laran”, esplika iha ámbitu fórum loron tolu (28 fevereiru to’o 1-2 marsu), organizada husi UNTL ho SEARCA (Southeast Asian Regional Center for Graduate Study and Research in Agriculture).

Iha fórum ho tema “Leaders in ASEAN Agriculture and development in Timor-Leste” ne’e iha aprezentasaun kona-ba asuntu mudansa klimátikA no seguransa klimátika, agribusiness, nutrisaun, dezenvolvimentu, inovasaun no seluk tan foka ba asuntu agrikultura, iha ne’ebé hato’o husi peskizadór nasionál sira no rejionál ne’ebé mai husi SEARCA.

Iha abertura, Reitór UNTL, Francisco Miguel Martins, hatete atividade ne’e eventu internasionál ne’ebé koopera ho SEARCA no MAP (Ministériu Agrikultura no Peska) hodi partilla no diskute kona-ba seguransa alimentár (Food Security) no mudansa klimátika no asuntu temátiku seluk tan.

“Eventu ne’e realiza tanba ita asina ona akordu ho SEARCA iha 2015 ne’ebé aleinde peskiza iha área agrikultura maibé fó mós bolsu estudu ba profesór sira husi Fakuldade Agrikultura, tantu iha Filipina no nasaun Aziátiku sira inklui Indonézia”, akresenta perante profisionál komunikasaun sosiál sira.

Pró-reitór Asuntu Kooperasaun, Profesór Eduardo Aniceto Serrão, hateten atividade loron tolu ne’e hanesan eventu aprendizajen hodi halibur entidade sira ne’ebé mak servisu ba área agrikultura nian ne’ebé responsabiliza ba seguransa alimentár.

“Atu garante seguransa alimentár ne’e, sira presiza hatene dalan sira atu akompaña ita-nia agrikultór sira no buka problema ne’ebé sai preokupasaun ba komunidade (agrikultór sira) hanesan produsaun, kolleta no bele mós organiza ba merkadu nomós efeitu sira husi mudansa klimátika”, dehan Eduardo Aniceto.

Enkuantu ligadu ho mudansa klimátika, haree husi parte akadémiku nian, Pró-reitór hatutan mudansa klimátika ne’e afeta ba produsaun agrikola direita, tanba Timor-Leste rai kiik maibé mudansa ne’e asuntu globál afeta mós.

“Ha’u dezeja katak ita-nia partisipante sira, liuhusi eventu aprendizajen ne’e sira bele hetan konseitu ruma”, nia espera, tuir informasaun TATOLI asesu, ohin.

Entretantu, Ministru Estadu no Ministru Agrikultura no Peska, Estanislau Aleixo da Silva, profere iha diskursu perante audiénsia sira katak Governu nafatin iha polítika, esforsu hodi investe atu hasa’e produsaun rai-laran atu reduz importasaun.

Fórum ne’e hetan partisipasaun husi partisipante sira na’in haatnulu resin mai husi instituisaun oioin, tantu governamentál, naun-governamentál no akadémiku sira inklui peskizadór husi UNTL no husi SEARCA.

Jornalista: Rafy Belo

Editora: Rita Almeida

HUSIK IDA HATÁN