DILI, (TATOLI) – Ministériu Agrikultura no Peska (MAP) halo ona tarefa foun ne’ebé mak atu aplika ba kompañia sira ba atividade peska nian iha tasi-mane liuliu ba espésie ikan ne’ebé mak atu hakail.
Diretór Jerál Peska, MAP, Acácio Guterres, hatete tarefa ida uluk ne’e halo tiha ona revizaun no ida foun ne’ebé mak atu aplika ba kompañia ne’e haree ba espésie ikan lahanesan, ezemplu ikan iha bee okos no leten.
“Ita aplika ba kompañia iha tinan ida liubá ne’e, tonelada ida dólar 150, agora ita aplika tonelada ida $1.150 entaun iha aumentu ida maka’as oinsá mak ita bele hetan reseita ruma ba interese públiku nian”, Acácio hatete iha Komoro, ohin.
“Tarefa ne’e bazea ba espésie ikan, ezemplu Tubaraun no ikan seluk como balun iha bee okos entaun ita aplika hanesan depois iha bee leten ne’e nia tarefa lahanesan, aplika $1.250 kada tonelada ba espésie hanesan Atún, ne’ebé uluk ne’e kada tonelada $250, entaun ida ne’e mak ita atu aplika fali”.
Kompañia sira ne’ebé hakail uluk ona ikan iha Kosta Súl mak husi Hong Long ho ró 15, maibé foin daudaun Governu suspende atividade tanba kazu haka’er ikan Tubaraun ne’ebé sei iha prosesu investigasaun no Best Seafood ho ró tolu ne’ebé halo mós atividade iha tasi-mane, enkuantu ró ida husi parte Indonézia prende tanba konsidera hakail iha sira-nia zona ekonómika eskluziva.
Jornalista: Maria Auxiliadora
Editora: Rita Almeida
