Silk Air Semo Kada Semana Tanba Menus Pasajeiru

0
139
Aviaun Silk Air. Foto/Google.

DILI, (TATOLI) – Kompañia aviasaun, Silk Air, ne’ebé hala’o atividade komersiál iha Timor-Leste hodi halo vou Singapura-Dili no Dili-Singapura aprezenta ona sira-nia pedidu atu redús oráriu semo ne’ebé antes ne’e semana ida dala tolu ba ida de’it iha kuarta durante fulan marsu nia laran tanba pasajeiru labarak.

Vogál ba Planu Administrasaun no Finansas, Autoridade Aviasaun Sivíl Timor-Leste (AACTL-sigla iha portugés), Ricardo da Costa Ribeiro, hatete tanba situasaun rai-laran daudaun ne’e halo pasajeiru ladún barak nune’e prejudika vou Dili-Singapura ne’e.

“Sira aprezenta ona pedidu atu redús sira-nia semo ne’ebé semana ida dala tolu muda ba dala ida iha kuarta, maibé pedidu nia laran ne’e husu atu provizóriu no razaun sira ne’ebé aprezenta ne’e razoavel duni katak situasaun hanesan ne’e, tanba ne’e mak ami mós fó fali provizóriu sira semo semana ida dala ida durante fulan-marsu nia laran, depois iha marsu ida ne’e sira bele aprezenta ou prolonga tan semana ida dala ida lai ou bele kontinua filafali ba oráriu normál”, Ricardo hatete iha Kaikoli, ohin.

Oráriu normál Silk Air nian antes ne’e semo husi segunda, kinta no sábadu, maibé liga ba situasaun Timor-Leste nian daudaun ne’e maka halo de’it atividade semo nian dala ida de’it kada semana iha marsu nia laran.

Aviaun Silk Air nu’udar Estadu Singapura nian ida ne’e hala’o ona atividade komersiál iha Timor-Leste besik tinan haat resin no iha garante atu semo nafatin iha país ida ne’e.

“Ita oras ne’e daudaun kompara ho nasaun seluk, aviaun sira ne’ebé semo pasajeiru atu uitoan ka barak ne’e semo nafatin, oráriu ne’e normál nafatin tanba sira iha subsídiu husi sira-nia nasaun, agora ita iha ne’e laiha, ida ne’e mak prejudika mós satán aviaun refere la’ós ema timoroan nian, ema husi rai-liur entaun bele prejudika mós”.

Pedidu husi Silk Air ne’e, husi parte AACTL fó ona autorizasaun, bainhira iha marsu liu mak situasaun hanesan nafatin no kompañia ne’e aprezenta tan maka sei kontinua prolonga oráriu ida ne’e, maibé se kondisaun di’ak ona no atu filafali ba oráriu normál maka sei normaliza fali.

Jornalista: Maria Auxiliadora

Editora: Rita Almeida

HUSIK IDA HATÁN