Sensus Populasaun Sei Halo Tan Iha 2020

0
333
Diretór Jerál Estatístika, Ministériu Planu no Finansas, Elias dos Santos Ferreira. Foto/Espesiál.

DILI, (TATOLI) – Diretór Jerál Estatístika, Ministériu Planu no Finansas, Elias dos Santos Fereira, hatete Timor-Leste halo ona sensus populasaun no uma-kain hamutuk dalatolu ne’ebé mak hahú iha 2004, 2010, 2015 no sei halo tan iha 2020.

“Governu momentu ne’ebá aprova para ita halo sensus kada tinan lima-lima, no sensus tuir sei iha 2020 depois 2020 ita sei halo kada tinan sanulu. Ita hatene katak sensus ne’e buat ezersísiu ida ne’ebé boot depois gasta ona orsamentu barak”, Elias hatete iha Kaikoli, ohin.

Iha sensus populasaun no uma-kain iha 2010, Diresaun Jerál Estatístika hakerek relatóriu temátiku iha 12 no 2015 mós 12 inklui monografia edukasaun ne’ebé lansa ona hanesan relatóriu ida husi 12 ne’ebé publika ba dahuluk nian.

Aleinde ne’e sei iha monografia kona-ba agrikultura ne’ebé serbisu hamutuk ho Food Agriculture Organization (FAO) ne’ebé iha hela prosesu nia laran, forsa traballu n’ebé sei suporta husi International Labour Organization (ILO) ne’ebé sei finaliza iha tempu badak, jéneru, mortalidade, projesaun populasaun, joven, uma no atlas ne’ebé mak importante liu.

“Projesaun populasaun ne’e para ita bele hatene katak projesaun poupulasaun ita halo entre 2015 to’o 2050, tanba ita hatene iha ministériu balun hakarak halo planu tinan lima mai, 5 anos mai ne’e foti dadus iha ne’ebé entaun foti dadus projesaun”.

Elias hatutan kona-ba sensus populasaun 2015 ne’ebé hala’o tiha ona ne’e, rekruta timoroan kuaze 5200.

“Pur tantu iha suku hotu iha Timor-Leste laran tomak ne’ebé mak hala’o ezersísiu ida ne’e tanba ita foti duni ema sira husi suku nune’e nia bele hatene nia área rasik”.

Orsamentu ba sensus 2015 liu millaun $5 no porsentu 75 mai husi Governu no husi doadór sira suporta mós orsamentu balun no barak liu mak apoiu ekipamentu hanesan GPS, laptop ba atividade sensus ne’e.

Rezultadu sensus populasaun 2015 nian, totál populasaun Timor-Leste hamutuk 1,167,242. Husi númeru ne’e, mane hamutuk 588,561 no feto iha 578,681 kompara iha sensus 2010, populasaun ne’ebe partisipa hamutuk 1,066, 409, mane iha 544, 198, no feto iha 522,242 ne’ebé hatudu katak durante tinan lima nia laran populasaun aumenta 100,833.

Jornalista: Maria Auxiliadora

Editora: Rita Almeida

HUSIK IDA HATÁN