Sani Nain Sira Tenke Lee Notísia Kredibel Iha Prosesu Eleisaun

0
85
Oradór sira ne’e hosi sorin loos komisáriu Konsellu Imprensa, Paulo Araújo, jornalista seniór hosi Austrália, Bob Howart (klaran) no Konselleiru Tékniku UNDP, Andreas de Castilo (liman karuk), ko’alia iha workshop loron sorin ho tema “Hametin Reportajen Balansu Liuhusi Disiplina Verifikasaun” ne’ebé realiza hosi KI, iha salaun Konferénsia UNDP, Kaikoli. Foto fan page KI

DILI, (TATOLI) – Konselleiru Tékniku Programa Dezenvolvimentu hosi Nasaun Unida (UNDP-sigla inglés), Andreas de Castilo, sujere ba sani nain sira ne’ebé akompaña informasaun lorloron liuhosi mídia sosiál facebook katak tenke asesu informasaun ne’ebé loos tanba ema barak uza meiu ne’e hodi halo propaganda ba sira nia interese iha ámbitu festa demokrásia.

“Bainhira eleisaun iha Amerika, notísia barak mak espalladu iha facebook, twitter no seluk tan konsidera notísia propaganda atu atinje sira nia objetivu, tanba ne’e leitór sira hakarak asesu informasaun ne’ebé loos, presiza akompaña mídia ne’ebé fó informasaun ho kredibel”, Castilo halo intervensaun iha workshop loron sorin kona-ba reportajen balansu iha eleisaun no verifikasaun ne’ebé hala’o iha salaun UNDP, Kaikoli, tersa, (20/3).

Haktuir ezemplu, notísia falsa eh (Fake News) ne’ebé ema halo iha ámbitu prosesu eleisaun ba Donald Trump sai Prezidente Amerika to’o agora sei iha prosesu diskusaun tanba notísia falsa ho influénsia boot durante prosesu demokrátiku, nune’e agora eis Prezidente Indonézia, Susilo Bambang Yudhoyono, sei halo hela prosesu investigasaun.

Tanba ne’e, mídia profesionál sira mós tenke kuidadu bainhira kopia informasaun hosi facebook, parte seluk bele plajia, maibé tenke konfirma nia nain hafoin foti hodi fó sai ba públiku atu informasaun bele kredibel.

“Loroloron ita akompaña notísia falsa iha mundu hanesan Amerika, Rusia, Eropa espesialmente bainhira iha momentu prosesu eleisaun, tanba ne’e lee nain sira presiza atensaun atu konsumu informasaun ne’ebé loloos”, katak.

Maibé importante mak prosesu eleisaun tenke haree no atensaun notísia verdadeiru eh falsa.

Nia hatete uluk ema lee jornál mak barak maibé agora ema ho númeru aas mak asesu meiu facebook hodi akompaña informasaun iha mundu, maibé dalabarak informasaun ne’ebé la kredibel, nune’e tenke konfirma notísia hotu hosi mídia sira atu komprova informasaun loloos.

Enkuantu, Timor-Leste iha hela prosesu eleisaun antesipada, atu evita informasaun falsa, mídia profesionál sira tenke tuir prosesu konfirmasaun ba fonte sira atu bele evita problema, katak tan.

Iha parte seluk, informasaun falsa iha facebook, jornalista seniór hosi Austrália, Bob Howart, sujere ba mídia sira atu kria facebook ofisiál atu kontrola informasaun falsa ho verdadeiru, atu kontrola ida ne’e ema tenke mai hosi profesionál komunikasaun sosiál, advogadu no seluktán.

Entretantu, Komisáriu Konsellu Imprensa, Paulo Araújo, reforsa programa treinamentu ne’e realiza tanba servisu hamutuk ho UNDP hodi haree ba realidade mídia sosiál nian iha Timor-Leste katak oinsá mak mídia profesionál uza instrumentu facebook bainhira kopia notísia ruma hosi ne’eba, enkuantu hakarak plajia informasaun ruma karik presiza konfirma fonte kredibel atu públiku bele fiar.

Jornalista: Zezito Silva

Editora: Rita Almeida

HUSIK IDA HATÁN