FDCH-RAEOA ZEESM Sei Koopera Dezenvolve Rekursu Umanus

0
244
Leonia Monteiro ne’ebé reprezenta prezidente RAEOA. FOTO/Midia FDCH

OE-CUSSE (TATOLI)—Kapasitasaun Rekursu Umanus ba funsionáriu públiku no timoroan hola parte asuntu ne’ebé importante tebes nune’e bele prepara timoroan sira asesu ba kampu servisu ho fasil no lalais.

Rejiaun Administrativu Espesiál Oe-CusseAmbeno (RAEOA) no Zona Espesiál Sosiál no Merkadu (ZEESM) husu apoiu no kolaborasaun di’ak ho Fundo de Dezenvolvimentu do Capital Humano (FDCH) atu apoiu hodi prepara timoroan sira atu hala’o servisu iha rejiaun administrativa espesiál ne’e bainhira kondisaun sira preparadu ona.

Tanba ohin loron fasilidade no kondisaun estadu komesa prepara ona hanesan Klínika korasaun, aeroportu ne’ebé besik finalize daudaun ona no investimentu importante sira ne’ebé hala’o hela iha RAEOA.

“Ohin loron iha Oe-Cusse kondisaun hotu-hotu komesa preparadu tanba ne’e presiza tebes prepara rekursu umanus atu bele prepara ba kondisaun sira ne’e,” hateten Leonia Monteiro ne’ebé reprezenta prezidente RAEOA.

Durante diskursu ba serimónia abertura formasaun Nivel Munisípiu no asina akordu téknika Instituto Nacional da Administração Publica (INAP) ho Dili Institute Technology (DIT)  ne’ebé hala’o iha Rejiaun Administrativu Espesiál Oe-Cusse Ambeno- RAEOA.

Nia hateten RAEOA hahú haruka ona Doutór na’in 6 ba hasai sira nia espesialista iha Portugal nune’e fila mai bele servisu ho di’ak liu-tan iha klínika korasaun RAEOA.

“Ita prepara kondisaun ita presiza rekursus umanus rua ne’e liga malu, sei koopera di’ak ho Fundo de Dezenvolvimentu do Capital Humano atu haruka-tan espesialista sira ba hasa’e tan sira nia kapasidade,” tenik Leonia Monteiro

Nia informa mós katak Konsellu Ministru foin lalais aprova tiha ona atu prosesa rekursu magnesium iha Oe-Cusse tanba ne’e presiza rekursu umanu mós, tanba ne’e rekursus umanus tenke preparadu iha area oin-oin.

Entretantu Secretario Executivo Fundo de Desenvolvimento do Capital Humano (FDCH) Isménio Martins da Silva hateten FDCH nia servisu mak atu asegura planu Estratéjiku Dezenvolvimentu  Nasionál (PEDN)  ba timór laran tomak iha  ámbitu formasaun profisionál  prepara futuru traballadores kualifikadus  ba merkadu traballu, ida fali reforsa funsionáriu públiku sira iha formasaun no bolsa estudu tanba ne’e prontu servisu hamutuk ho RAEOA ZEESM.

“Iha programa bolsa estudu iha tinan ne’e iha orsamentu ne’ebé disponivel ba RAEOA ZEESM, espera katak iha tinan ne’e RAEOA ZEESM bele ezekuta sira nia osan, iha osan ne’ebé primeiru ita fó uluk ba médiku espesialista sira, balun ba ona Portugal ho ZEESM nia osan rasik balun ne’ebé indireitamente kanaliza tuir FDCH atu hein katak tinan ne’e ita bele iha tan estudante médiku sira atu haforsa tan sira nia espesialidade iha médiku nian,” hatete Sekretáriu Ezekutivu FDCH Isménio Martins.

Oe-Cusse konsidera nu’udar rejiaun administrativu espesiál bainhira lei númeru 3/2014 Parlamentu Nasionál aprova ho unanimidade ba lei ne’e hosi membru paralmentu sira hodi implementa programa, planu kontestu Zona Espesiál Ekonomia Sosiál de Merkadu.

Tanba ne’e ohin loron Oe-Cusse hahú prepara no dezenvolve fasilidade no kondisaun oin-oin hanesan harii ona hospital ba fuan nian, Aeroportu no dezenvolvimentu infraestrutura boboot sira iha rejiaun ne’e importante tebes prepara rekursus umanus ho kualifikadu nune’e bele servisu bainhira kondisaun hira ne’e kompleta ona.

(Media FDCH)

HUSIK IDA HATÁN