PR Lú Olo Promulga Ona Estatutu Konsellu Kombatente Libertasaun Nasionál

0
105
Prezidente Republika, Francisco Guterres Lu Olo. Foto Antonio Goncalves

DILI, (TATOLI) – Prezidente Repúblika (PR), Francisco Guterres Lú Olo, promulga ona proposta Dekretu-Lei ne’ebé mak aprova Estatutu Orgániku Konsellu Kombatente Libertasaun Nasionál iha 21 marsu 2018 liu-ba.

Diploma legál ne’e ninia intensaun atu define estrutura, objetivu no kompeténsia sira Konsellu Kombatente ne’e nian. Konsellu ne’e hamriik nu’udar asosiasaun públika ida ne’ebé mak sai nu’udar órgaun sentrál ba organizasaun sira hotu veteranu nian iha Timor-Leste. Konsellu ne’e nu’udar órgaun konsulta Governu nian kona-ba asuntu hirak ne’ebé relasionadu ho veteranu.

Tuir komunikadu ofisiál hosi Mídia Palásiu Prezidente Nicolau Lobato ne’ebé Tatoli asesu segunda (26/3) katak Prezidente Repúblika promulga diploma ne’e tanba hakarak tebes atu involve veteranu sira iha prosesu dezenvolvimentu nasionál nomós hakarak kontribui ba prosesu hadi’a veteranu sira-nia moris liuhosi konsellu ne’e.

Iha tinan 2017, Prezidente Repúblika veta diploma ne’ebé mak foin hetan promulgasaun tanba dúvida balu kona-ba konteúdu diploma ne’e ligadu ho aspeitu konstitusionalidade no legalidade.

“Iha momentu ne’ebá Prezidente Repúblika la promulga tanba hakarak atu iha diploma legál ida ho kualidade di’ak, nunee la hamosu problema iha prátika. Prezidente Repúblika jura defende no halo tuir Konstituisaun no Lei sira. Tan ne’e mak iha momentu ne’ebá Prezidente Repúblika hato’o ninia dúvida liuhosi veto no hato’o nafatin disponibilidade ba Governu no ba Parlamentu Nasionál atu halo serbisu hamutuk ba kestaun veteranu sira-nian”, hatete komunikadu imprensa.

Prezidente Repúblika hein katak entidade públiku hotu ho komponente privadu tomak sei esforsu hodi konkretiza timoroan hotu nia mehi inklui veteranu sira ne’ebé durante tinan barak dedika án tomak ba ukun rasik án bele sente duni rezultadu hosi independensia ne’e.

Promulgasaun Dekretu-Lei ne’e parte husi kompromisu polítika Prezidente Repúblika durante mandatu hodi hatúr ás kestaun Kombatente Libertasaun Nasionál no Veteranu Luta Independénsia nian.

Ho promulgasaun Dekretu-Lei ne’e bele halibur veteranu sira hodi hamutuk kontinua kontribui ba dezenvolvimentu nasionál.

Jornalista: Xisto Freitas

Editora: Rita Almeida

HUSIK IDA HATÁN