PNTL no F-FDTL Preparadu Halo Atuasaun iha Kampaña EA

0
86
Majór Jenerál FALINTIL-Forsa Defeza Timor-Leste (F-FDTL), Lere Anan Timur akompaña hosi Komandante Jerál, Polísia Nasionál Timor-Leste (PNTL), Komisáriu Júlio da Costa Hornay, sesta, (20/10) loraik ne'e hafoin hasoru Prezidente Repúblika, Francisco Guterres Lú Olo iha Palásiu Prezidente Nicolau Lobato, Bairo Pité, husu ba ema hotu atu kontribui ba estabilidade. Foto dokumentasaun Tatoli/Xisto Freitas

DILI (TATOLI)—Komandante Jerál Polísia Nasionál Timor-Leste (PNTL), Komisáriu Júlio da Costa Hornay hateten PNTL no FALINTIL-Forsa Defeza Timor-Leste (F-FDTL) oras ne’e iha prosesu preparasaun ba kampaña no eleisaun antesipada (EA) ne’ebé atu hala’o iha abril no maiu.

“Ami informa ba Prezidente Repúblika, Francisco Guterres Lú Olo, katak ita nia PNTL en-koordenasaun ho Forsas Armadas prontu ona atu asegura eleisaun antesipada no prontu halo atuasaun karik problema mosu iha eleisaun,” Júlio Hornay hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, Dili, kinta ne’e, hafoin relata kestaun seguransa ba Xefe Estadu Lú Olo.

Nia esplika, sira forma ona Komandu Kooperasaun iha  Kuartél Jerál PNTL ne’ebé kompostu hosi reprezentante PNTL no F-FDTL, no dezloka ona ba munisípiu sira hodi identifika fatin risku hodi koloka Komando Operasaun.

“Ema hanoin katak zona risku maka Baucau, Viqueque, Lautem no Dili, maibé ha’u hanoin la loos. Oras ne’e, Baucau-oan, Viqueque, Lautem no Dili intende ona polítika no demokrasia. Ne’e duni, sei la hamosu problema hanesan uluk,” Hornay haktuir.

Nia apela ba joven sira atu koopera ho parte seguransa no defeza hodi lori nasaun ida ne’e ba oin no hiit Timor-Leste nia naran iha mundu, katak Timor-Leste bele iha problema polítika iha rai laran maibé timoroan sira intende ona polítika no demokrasia.

“Joven sira tenke hadau moris lor-loron nian no hadau futuru (eskola) para aban bainrua sai matenek hodi ukun rai ida ne’e, duké gasta tempu ba mete kampaña tún sa’e tanba bainhira hetan kanek no mate, saugati. Hakmatek de’it iha fatin to’o eleisaun maka ba vota iha sentru votasaun,” nia nforma.

(Jornalista: Xisto Freitas)

(Editór : Manuel Pinto)

HUSIK IDA HATÁN