PNTL-F/FDTL Kordenadu Asegura EA

0
157
Prezidente Repúblika kondekora Major Jenerál, FALINTIL-Forsa Defeza Timor-Leste (F/FDTL), Lere Anan Timur iha selebrasaun aniversáriu PNTL ba dala XVIII, ho tema “PNTL Prontu Hametin Estabilidade no Pás ba Povu no Rai Doben Timor-Leste”

DILI (TATOLI)—Major Jenerál, FALINTIL-Forsa Defeza Timor-Leste (F/FDTL), Lere Anan Timur informa, Polisia Nasionál Timor-Leste (PNTL) ho F/FDTL sei koordena di’ak liu tan hodi garante pás no estabilidade hosi períodu kampaíña to’o realizasaun eleisaun antisipada.

“Kooperasaun F/FDTL no PNTL sira sei koopera nafatin no servisu hamutuk atu bele asegura estabilidade tantu kampaíña to’o eleisaun,” Lere Anan Timur hato’o iha akademia PNTL, Komoro, ohin.

Povu, tuir Lere mak sai autór ba pas no estabilidade tanba ne’e, husu atu povu kontinua kolabora ho autoridade seguransa no defeza hanesan PNTL ho F/FDTL hahú hosi períodu kampaíña to’o realizasaun eleisaun antisipada.

“PNTL ho F/FDTL intervein kuadu iha problema, povu no lider mak tenke garante seguransa, lider sira tenkii evita liafuan insulta,” Lere fó hanoin.

Ba PNTL, Jenerál fitun rua ne’e husu atu mantein profisionalizmu no aumenta formasaun rekursu umanus ba membru PNTL sira.

Aleinde ida ne’e, governu mós tenke kria tan kondisaun para PNTL sai profisionalizmu liu tan hanesan F/FDTL. Aumenta tan polisia komunitáriu hodi habesik liu tan seguransa ba povu.

Entretantu relasiona ho loron ohin PNTL komemora aniversáriu ba dala 18, jenerál F/FDTL ne’e lori instituisaun F/FDTL nia naran hato’o parabéns ba instituisaun PNTL no agradese ba governu ho PNTL tanba kondekora Jenerál Lere.

“Kondekorasaun ne’e la’ós ba ha’u, Lere, maibé ba instituisaun F/FDTL tanba durante ne’e instituisaun rua ne’e mak kria komunikasaun, koordenasaun servisu hamutuk di’ak tebes, tanba ne’e, mak sira (PNTL) rekoñese hodi kondekora ha’u nu’udar komandante forsa armadas,” Lere Anan Timur haktuir.

Jornalista:Agapito dos Santos

Editór : Manuel Pinto

HUSIK IDA HATÁN