PM TL-Australia La Partisipa Asina Akordu Ketan-Tasik Iha Novaiorke

0
731

DILI, (TATOLI)—Timor-Leste ho Australia sei asina tratadu foun kona-bá delimitasaun ketan-tasik sira (Fronteira Marítima) iha loron 6 fulan-Marsu mai ne’e, iha Novaiorke, sasin hosi Sekretáriu Jerál ONU, António Guterres, iha oin.

Iha asina tratadu ne’e konfirmadu ona katak, Primeiru-Ministru Austrália nian, Malcom Turnbull, ho Primeiru Ministru Timor-Leste, Mari Alkatiri sei la iha prezensa, tanba ne’e laiha sentidu atu Primeiru Ministru Timor-Leste nian dezloka ba Novaiorke iha loron 6 fulan-Marsu ne’e.

Atuál Ministru Adjuntu Primeiru-Ministru nian Agio Pereira, maka sei reprezenta Timor-Leste hodi asina akordu kona-ba Delimitasaun Ketan sira (Delimitasaun Fronteira), no Austrália sei reprezenta husi atuál Ministra Negósiu Estranjeiru, Julie Bishop.

Tuir komunikadu emprensa ne’ebé ajénsia TATOLI asesu hosi gabinete Prezidénsia Konsellu Ministru, esplika katak, la tuir ona buat ne’ebé  mak ema hotu hein, serimónia asinatura kona-ba akordu ne’e sei la konta ho prezensa atuál Primeiru-Ministru Austrália nian, Malcom Turnbull, nune’e mós sei la iha prezensa husi Primeiru-Ministru Timor-Leste nian, Marí Alkatiri.

“Konteúdu husi akordu ne’ebé sei halo entre Timor-Leste no Austrália ne’e ko’alia liu kona-ba delimitasaun liña ketan-tasik nian entre nasaun rua ne’e, no la ko’alia kona-ba aspetu sira ne’ebé relasiona ba esplorasaun Greater Sunrise nian.”

“Iha ona konfirmasaun ofisiál katak Primeiru-Ministru Austrália nian sei la marka prezensa iha serimónia asinatura tratadu ne’e nian, no tanba ne’e laiha sentidu atu Primeiru Ministru Timor-Leste nian dezloka ba Novaiorke iha loron 6 fulan-Marsu ne’e”, deklara atuál lider husi Governu Konstitusionál VII.

Hafoin asinatura, tratadu ne’e sei hetan ratifikasaun husi Parlamentu Timor-Leste no Austrália nian, no tuirmai sei vigor iha Ordenamentu jurídiku internu nasaun rua ne’e nian.

(***)

HUSIK IDA HATÁN