PM Halo Inspesaun Ba Estrada Aitutu-Same

0
211
Vise Ministru Obras Publikas, Mariano Renato (klaran) hamutuk ho Diretór Kompaña Tinolina, Agostinho Gomes (liman loos) esplika hela prosesu konstrusaun estrada Aitutu-Same ba Primeiru Ministru, Mari Alkatiri (liman karuk). Foto Tatoli/Xisto Freitas

SAME, (TATOLI) – Primeiru-Ministru, Marí Alkatiri, halo inspesaun ba estrada hosi Aitutu, Postu Administrativu Maubisse, Ainaro, ba to’o iha Same, Munisípiu Manufahi, kinta (8/3) lorokraik.
Konstrusaun estrada ho nia luan kuaze metru neen no distánsia kilómetru 25 hosi Aitutu ba Same no konta mós ho konstrusaun estrada iha Same Vila laran kuaze kilómetru 25 ne’e gasta orsamentu hamutuk miloens $42.

Projetu ne’ebé hahú iha 2013 liu-ba no finaliza iha fulan kotuk, tinan ne’e, kaer hosi kompaña Tinolina.

Diretór Kompaña Tinolina, Agstinho Gomes, esplika konstrusaun ne’e finaliza ho tarde tanba hetan obstáklu oi-oin durante implementasaun.

“Projetu ne’e dura to’o tinan lima tanba rezolve (kompensa) komunidade sira nia ai-horis (kafé) ne’ebé tama iha área konstrusaun hahú hosi Holarua, Same, to’o iha área Same”, haktuir.

Iha fatin hanesan, Vise Ministru Obras Públikus, Mariano Renato, hateten relatóriu ne’ebé nia parte simu hosi tékniku Obras Públikas no Ajénsia Dezenvolvimentu Nasionál (ADN) katak kualidade estrada refere di’ak, maibé seksaun balun la konsege implementa tanba rai halai (erosaun).

“Kilómetru 1.2 la konsege implementa tanba rai halai. Ne’e duni, presiza halo tan estudu ida viável para bainhira implementa projetu labele iha failansu”, katak.

Nia dehan presiza mós fó atensaun ba trouxe seluk katak bainhira nahe alkatraun labele iha udan laran.

Renato hateten pagamentu ba obra ne’e seidauk finál tanba seidauk halo inspesaun finál ba obra refere nomós kompanha seidauk finaliza trouxe balun no monta sinais tránzitu.

“Governu halo tiha ona pagamentu ba obra ne’e kuaze pursentu 93”, esklarese.

Entretantu, PM hateten kualidade obra ne’e aseitável, maibé presiza halo estudu didi’ak ba bee no rai ninian ba trouxe balun ne’ebé seidauk finaliza.

Nia realsa sei halo inaugurasaun ba projetu refere bainhira tékniku sira remata halo estudu ba kualidade obra, maibé triste tanba projetu ho distánsia badak oituan maibé orsamentu boot.

Jornalista: Xisto Freitas

Editora: Rita Almeida

HUSIK IDA HATÁN