PM Alkatiri Hato’o Parabéns ba Xanana Gusmão

0
645
Xefe Governu, Mari Alkatiri dada lia ho Kay Rala Xanana Gusmão. Foto dokumentasaun Tatoli

DILI, (TATOLI) – Primeiru-Ministru, Marí Alkatiri, hato’o parabéns ba Xefe Negosiadór ba negosiasaun ketan tasi ho Indonézia no Austrália, Kay Rala Xanana Gusmão no ekipa relasiona ho rezultadu negosiasaun ho Austrália hodi define liña ketan tasi (fronteira marítima).

Ohin loron ekipa negosiasaun no governu liuhosi Ministru Agio pereira asina ona akordu ho Governu Austrália kona-ba liña ketan tasi entre nasaun rua iha Nova Iorke.

“Ha’u hato’o parabéns ba ekipa negosiadór, liliu Irmaun Xanana Gusmão, Agio Pereira no ekipa, tanba konsege duni iha tempu badak lori akordu ne’e maiʺ, hatete Xefe Governu iha edifisiu RTTL Kaikoli, ohin.

Alkatiri hateten orgullu ho rezultadu ne’e, tanba marka tan istoría ba Nazaun ne’e iha ninia mandatu Governu dahituk.

Hatutan tan Nasaun iha ona liña ketan definitivu ho Austrália, tanba ne’e  tenke kapasita FALINTIL-Forsa Defeza Timor-Leste no Polísia Nasionál Timor0Leste  hodi fó protesaun di’ak liu ba ita nia tasi.

Xefe Ezekutivu realsa governu foun ne’ebé sei mai tenke kria polítika di’ak hodi proteje Nasaun ninia soberania, liliu iha tasi laran.

Xanana Gusmão nu’udar Xefe Negosiadór ba negosiasaun Fronteira Marítima ho Indonézia no Austrália bazea ba rezolusaun governu númeru 9/2016, loron 3 fulan-fevereiru 2016.

Jornalista: Agapito dos Santos

Editora: Rita Almeida

HUSIK IDA HATÁN