PD Sei Elabora Programa Kampaña

0
116
Logo Partidu Demokrátiku.

DILI, (TATOLI) – Períodu kampaña eleitorál sei akontese iha loron 10 abril to’o  9 maiu, tanba ne’e ezije Partidu Polítiku (ParPol) sira halo preparasaun ba loron ne’e, ho ida ne’e Partidu Demokrátiku (PD) elabora hela programa atu lori ba kampaña iha eleisaun antesipada.
Maske hamutuk forma governu dahituk ho Partidu Frente Revolusionária Timor-Leste Independente (FRETILIN), maibé PD hakarak la’o ketak iha kampaña ho matéria ne’ebé hanesan mas sei elabora.

“Programa PD no FRETILIN foti mak programa ne’ebé rejeita ona iha Parlamentu Nasionál (PN) tanba ami iha konkordánsia katak ida ne’e mak matéria kampaña ba partidu rua, maibé ida-idak kampaña ninian, PD sei lori matéria sira ne’e ba kampaña”, Prezidente Komisaun Polítika Nasionál (KPN) PD, Adriano do Nascimento, hatan ba jornaliata sira iha Palásiu Governu, ohin.

Hodi dehan agora dadauk sei diskute programa ba eleisaun no ba governu bainhira PD ukun tanba programa governu dahituk ne’ebé iha ona tenke halo atualizasaun ho prioridade ne’ebé mak PD iha mesmu partidu rua ne’e iha konsensu ona katak bele uza ba kampaña eh uza bainhira aban-bain rua karik ukun.

Tuir nia programa prioridade PD nia agora mak polítika abitasaun ne’ebé ema bele iha asesu ba uma no programa seluk mak fó kréditu ba timoroan ne’ebé matenek maibé inan aman labele selu ba eskola, alende ne’e programa lubun ida, agora PD sei konsentra ba rua ne’e.

Mesmu loron aprezenta lista kandidatura membru Parlamentu Nasionál to’o de’it 22 marsu, tuir Adriano iha tempu badak PD sei realiza konferénsia ida atu deside preparasaun sira ba eleisaun antesipada.

“Ami prepara hela lista kandidatura hodi submete ba Tribunál Rekursu no halo hela konsolidasaun hodi identifika fatin atu kampaña, tanba ne’e halo hela diskusaun hafoin tempu badak halo konferénsia ida hodi bele aprova programa kampaña no programa ukun nian”, katak.

Jornalista: Julia Chatarina

Editora: Rita Almeida

HUSIK IDA HATÁN