ParPol Tenke Mantein Fó Oportunidade Ba Feto

0
76
Diretora Ezekutivu Fundasaun Alola, Alzira Reis. Foto espesiál

DILI, (TATOLI) – Diretora Ezekutivu Fundasaun Alola, Alzira Reis, husu ba Partidu Polítiku (ParPol) atu mantein nafatin fó oportunidade ba feto sira iha ambiente polítika liliu iha eleisaun antesipada.

“Ha’u fó hanoin ba Partidu Polítiku (ParPol) sira atu asegura feto sira nia envolvimentu iha vida polítika, tanba feto ho mane iha direitu atu kontribui iha prosesu polítika no dezenvolvimentu nasionál”, Alzira Reis ba jornalista sira iha Maskariñas relasiona ho loron mundiál feto ne’ebé monu ohin.

Tanba ne’e, feto sira tenke nakloke-án, buka aprende hodi dezenvolve kareira polítika no profesionál, feto labele limita-án maibé dedika-án liuhosi kapasidade ne’ebé iha hodi kontribui ba dezenvolvimentu Nasaun nian.

Nune’e, hosi konstituisaun rasik fó oportunidade ba feto sira tanba haree hosi pasadu, feto mós iha kontribuisaun ba prosesu luta libertasaun nasionál tanba ne’e feto sira iha direitu atu partisipa iha setór hotu ba dezenvolvimentu Timor-Leste nian.

Maibé númeru feto lideransa agora sei mínimu, nune’e feto sira tenke prepara-án didiak hodi hakat ba oin, feto tenke prontu no iha korajen tanba oportunidade barak sei mai iha futuru.

“Partisipasaun feto atinje pursentu 30 ba nivél hotu la’ós ba parlamentu nasionál de’it, suku pursentu tolu no munisípu eh administradór feto la iha”, katak.

Enkuantu, realmente feto barak prontu ona maibé oportunidade mak la iha no dalaruma oportunidade iha maibé la asegura ho fasilidade ne’ebé suporta feto sira hodi hakat liliu apoiu hosi uma laran, família no instituisaun Estadu sira.

Parte seluk, Prezidente Grupu Muller Parlamentár Timor-Leste, Antonia Brigida Correia, akresenta tempu ona atu feto rurál ho urbana tau esforsu hamutuk hodi transforma moris feto nian eh feto sira tenke tau liman hamutuk hodi eleva feto nia moris di’ak liután.

Entretantu, selebrasaun loron mundiál feto ne’ebé akontese ohin, 8 Marsu, organiza hosi Alola Foundation no Organizasaun Asisténsia Legál ba Feto no Labarik (ALFeLa) ne’ebé hetan partisipasaun hosi lider feto hosi ParPol hanesan Partidu Libertasaun Populár (PLP), Kmanek Haburas Unidade Nasionál Timor Oan (KHUNTO), Partidu Demokrátiku no Prezidente GMPTL.

Enkuantu feto sira hosi ParPol balun la marka prezensa tanba hetan ona konfirmasaun maibé dehan ajenda barak.

Jornalista: Zezito Silva

Editora: Rita Almeida

HUSIK IDA HATÁN