MT Estabelese Ona Sentru Informasaun Turístika

0
70
Ministru Turizmu (MT), Manuel Vong halo diskursu iha inaugurasaun SIT. Foto Tatoli/Egas Cristovao.

DILI, (TATOLI)-Sentru Informasaun Turístika (SIT) ne’ebé bazeia ba Planu Estratéjiku Dezenvolvimentu Nasionál (PEDN) katak sei estabelese sentru informasaun turístika iha zona tolu mak orientál, sentrál no osidentál, iha zona sentrál inaugura ona iha kapitál Dili.

Ministru Turizmu (MT), Manuel Vong, hatete sentru informasaun turístika ida ne’e sai hanesan fatin ida ne’ebé serve atubele fó informasaun ba turista potensiál sira no mós ema hirak ne’ebé hakarak hatene kona-ba turizmu ne’e rasik liuliu poténsia turístika iha rai-laran. Atu bá iha fatin ne’ebé, otél ho nia presu hira, fasilidade akomodasaun oinsá no mós transporte tanba liuhusi fatin ne’e sei tulun turista sira.

“Fatin informasaun turístika normalmente sei tulun atu halo promosaun ba ita-nia destinu turístiku ida no inaugurasaun ne’e bele fó ona oportunidade ba Ministériu Turizmu atu divulga informasaun sistematizadu ba iha komunidade sira ne’ebé mak presiza atu hatene informasaun”, Vong hatete iha ámbitu inaugurasaun Sentru Informasaun Turístiku iha Lesidere, horisehik.

Konstrusaun ba instalasaun ida ne’e hahú iha Janeiru 2017 husi Governu anteriór no finaliza iha Dezembru tinan refere ne’ebé mak konstroi husi kompañia timoroan nian ho naran Ervel, Lda no iha loron 12 Marsu inaugura husi Primeiru-Ministru Sestu Governu Konstitusionál, Marí Bin Amude Alkatiri.

“Orsamentu ne’ebé aloka ba instalasaun ida ne’e hamutuk 348, 302. 67 (trezentos e quarenta e oito mil trezentos e dois e seissenta e sete) ne’ebé finansia husi  ADN (Ajénsia Dezenvolvimentu Nasionál), maibé bazeia ba planu MT nian”.

“Ita-nia kultura, ita-nia istória no natureza sai hanesan poténsia turístika atu dezenvolve iha oin mai”.

Aleinde ida ne’e Vong informa, Ministériu Turizmu tau ona nia prioridade haat mak hametin regulamentasaun ba dezenvolvimentu turizmu sustentável, proteje traballadór no investidór sira-nia interese, harii autoridade nasionál turizmu nu’udar órgaun reguladora no kontinua implementa polítika nasionál turizmu no dezenvolve setór turizmu nu’udar indústria transversal.

 “Ba ne’e, modelu turizmu baze komunitáriu no inisiativa turizmu ne’ebé lori benefísiu ba komunidade sei sai hanesan modelu ba dezenvolvimentu turizmu ne’e rasik”.

Hatutan iha 2018 sei fó prioridade ba buat lima mak halo identifikasaun ba rekursu turístiku iha territóriu tomak, sei halo planu estratéjiku ba dezenvolvimentu turizmu ne’e rasik, sei halo planu Ordenamentu turístiku tanba iha zona kosteira kuaze halo konstrusaun, maibé lá konsidera Ordenamentu territóriu ida ne’ebé di’ak no atu hametin liután turizmu baze komunitáriu presiza kria kooperativa turizmu baze komunitáriu.

Tanba ne’e presiza harii ou kria fundu turizmu hodi nune’e hamenus subsídiu no kanaliza komunidade iha kooperativa atu asesu ba kréditu hodi halo investimentu tanba turizmu ne’e negósiu la’ós organizasaun kooperativa baibain atu hetan apoiu sosiál de’it mas hakarak dezenvolve setór ne’e didi’ak.

Atubele dezenvolve zona turístika sira ne’e maka presiza kria sentru apoiu dezenvolvimentu integrada no abranjente ka SADIA iha zona turístika tolu.

Ministériu relevante, stakeholder sira tomak bele hola parte iha prosesu dezenvolvimentu ne’e hodi lori duni turizmu hanesan setór indústria ida ne’ebé transversal no kontribui ba iha dezenvolvimentu ekonómiku hodi bele kria kampu traballu, redusaun pobreza nó mós aumenta taxa ba iha Estadu.

SIT iha Dili ne’e sei kria unidade téknika ida iha aeroportu Dili, iha fatin turístika sira hanesan Kristu Rei, Area Branca hodi fasilita turista sira atubele hetan informasaun ne’ebé mak presiza.

Jornalista : Maria Auxiliadora

Editór : Manuel Pinto

 

HUSIK IDA HATÁN