MSS Disemina Lei Seguransa Sosiál ba UNTL

0
32
estrutura makro no mikro Universidade Nasionál Timor Lorosa’e (UNTL) partisipa iha diseminasaun. Foto: Media UNTL

DILI, (TATOLI) – Ministériu Solidaridade Sosiál (MSS), Diresaun Nasionál Rejime Kontributivu Seguransa Sosiál disemina lei númeru 12/2016, 14 novembru kona-ba Seguransa Sosiál, Rejime Kontributivu ba estrutura makro no mikro Universidade Nasionál Timor Lorosa’e (UNTL).

“Ita hotu hatene katak iha 2016 Parlamentu Nasionál aprova lei ida importante tebes ba ema hotu, lei ne’ebé mak sei abranje ba sidadaun hotu nia vida no siklu vida, lei ne’e mak rejime kontributivu seguransa sosiál”, dehan diretora nasionál Rejime Kontributivu Seguransa Sosiál, Aida Maria Soares Mota, iha fim-de-semana ne’e iha salaun MOPTK, Kaikoli.

“Atu dehan katak seguransa sosiál ne’e rasik em prinsípiu direitu fundamentál direitu umanu nomós konsagra ita-nia  lei inan iha artigu 56o”, reforsa diretora ne’e perante estrutura no funsionáriu UNTL sira.

Iha artigu ne’e, deskreve katak 1) sidadaun hotu-hotu iha direitu ba seguransa no asisténsia sosiál, tuir lei haruka. 2) estadu hola medida sira tuir nia kbiit nasionál nian, hodi halo organizasaun ho nia sistema ida ba seguransa sosiál, 3) estadu apoia no fiskaliza, tuir lei, ba serbisu no funsaun instituisaun solidariedade sosiál nian, no seluk tan ne’ebé nu’udar interese públiku la buka lukru /funan.

Enkuantu iha Deklarasaun Universál Direitu Umanu, artigu 22o, ho tradusaun livre katak ema ida-idak, nu’udar membru sosiedade iha direitu ba seguransa sosiál hodi realiza nia direitu ba ekonomia, sosiál no kultura ne’ebé mak presiza tebes ba dignidade no nia kresimentu livre, liuhusi esforsu nasionál sira nune’e mós kooperasaun internasionál no tuir regulamentu nomós rekursu umanu kada nasaun.

Apartir ita hahú ita-nia restaurasaun independénsia, estadu Timor-Leste komesa ona dezenvolve ona programa asisténsia sosiál”, akresenta Aida Maria Soares Mota.

Reitór UNTL, Francisco Miguel Martins, iha abertura atividade hatete ho diseminasaun ne’e profesór no funsionáriu sira bele hatene sira-nia direitu no dever hodi fó kontribuisaun liuhusi vensimentu kada fulan, nune’e bainhira aposenta (pensiun) bele iha direitu ba ne’e.

Iha UNTL, profesór balun atu tama no tama ona idade ba aposentasaun maibé UNTL kontinua estende hela tanba sira-nia profisionalizmu.

“Ami sei estende tan tanba ami presiza sira-nia kualidade, sira ne’ebé mak doutoramentu, mestradu, UNTL sei presiza nafatin tanba sira-nia profesionalizmu akadémiku”, akresenta reitór Francisco Miguel Martins.

Entretantu, rejime ne’e aprovadu husi Parlamentu Nasionál. Nune’e mós lei ne’e promulga no publika ona iha Jornál Repúblika, sériu I, nú.43 A, segunda, 14 novembru 2016.

Lei ne’e nia objetivu mak proteje traballadór sira no hadi’a atividade ekonómika. Prinsípiu báziku lei seguransa sosiál réjime kontributivu ne’e mak halo repartisaun no justisa sosiál; solidariedade entre jerasaun no solidariedade iha jerasaun ne’ebé mak hanesan. Públiku; estadu mak responsabiliza ba polítika ida ne’e.

Tuir mai, úniku; ba traballadór sira hotu, husi ramu atividade sira hotu, permite fleksibilizasaun merkadu traballu: direitu ba serbisu sempre manten, maske bainhira muda entidade empregadora ka setór atividade. Kontributivu no autofinansiadu; prestasaun sosiál sira finansiada eskluzivamente husi kontribuisaun traballadór sira nian no nia entidade empregadora sira.

Rejime Kontributivu Seguransa Sosiál kria dever no direitu, katak sidadaun sira iha dever insekreve iha Seguransa Sosiál (SS), fó no atualiza informasaun sira, entregra deklarasaun remunerasaun nian, selu kontribuisaun sira, kumpri prazu garantia no aprezenta rekerimentu prestasaun nian.

Sidadaun sira iha direitu hodi simu prestasaun sosiál hanesan subsídiu maternidade, paternidade, adosaun, risku klíniku bainhira isin-rua, mate, sobrevivénsia, pensaun invalidez absoluta, pensaun invalidez relative, pensaun vélise (ferik eh katuas) no subsídiu asidente traballu.

Jornalista: Rafy Belo

Editora: Rita Almeida

HUSIK IDA HATÁN