MNEK Relata Serbisu Bilaterál no Rejionál

0
103
Ministru Negósiu Estranjeiru no Kooperasaun (MNEK), Aurélio Cristóvão Guterres.

DILI, (TATOLI) – Ministru Negósiu Estranjeiru no Kooperasaun (MNEK), Aurélio Cristóvão Guterres, relata serbisu MNEK nian ba Prezidente Repúblika, Francisco Guterres Lú Olo, kinta ne’e iha Palásiu Prezidente Nicolau Lobato, Bairru Pité.

“Atividade mensál ne’ebé maka MNEK regularmente mai hato’o ba Prezidente Repúblika maka serbisu ba nível bilaterál no rejionál”, nia dehan ba jornalista sira hafoin hasoru Xefe Estadu.

Iha nível rejionál, Aurélio haktuir, atualiza serbisu ne’ebé maka ligasaun ho Komunidade Nasaun sira Ko’alia Lian Portugés (CPLP-sigla portugés) partikularmente preparasaun vizita Prezidente Repúblika hala’o vizita ba simeira CPLP iha sidade Praia, Cabo Verde, jullu tinan ne’e.

Aleinde ne’e, nia hatutan, atualiza informasaun ba Prezidente Repúblika kona-ba preparasaun ba Asosiasaun Nasaun sira Sudeste Aziátiku (ASEAN-sigla inglés) ne’ebé maka Governu liuhusi rezolusaun Konsellu Ministru delega eis Prezidente Repúblika, José Ramos Horta, lidera prosesu Timor-Leste tama ASEAN.

Preparasaun adere ba ASEAN, nia esplika, durante ne’e la’o, tan ne’e Konsellu Ministru nomeia José Ramos Horta lidera prosesu ne’e para bele involve ministériu hotu-hotu, nune’e serbisu hirak ne’e bele iha koordenadu liu-tan no integradu.

José Ramo Horta, tuir Aurélio, iha esperiénsia diplomasia tinan 40 resin, ne’e duni esperiénsia sira ne’e bele kontribui lori TL tama ASEAN.

Oras ne’e, governante ne’e afirma MNEK kontinua reforsu formasaun ba diplomata sira no koordena nafatin atu prepara formasaun ba pesoál sira hosi ministériu relevante sira atu priénse rekezitu membru ASEAN nian.

Aurélio tenik, ba nível bilaterál, kontinua halo kooperasaun ho Nasaun sira ne’ebé maka durante ne’e hala’o serbisu hamutuk ho Timor-Leste.

“Hato’o mós internalmente serbisu ne’ebé ligasaun ho MNEK hodi ajuda sidadaun hosi nasaun seluk ne’ebé hetan dezastre inklui mós resensiamentu eleitorál ne’ebé maka hala’o iha Austrália, Portugal, Reinu Unidu no Korea Súl. Ita mós hato’o ba Prezidente Repúblika kona-ba pasaporte timoroan sira nian ne’ebé halao estudu iha rai liur ne’ebé kadukadu tiha ona, tan ne’e ami prepara hela meius oinsá bele ajuda sidadaun hirak ne’e”.

Jornalista: Xisto Freitas

Editora: Rita Almeida

HUSIK IDA HATÁN