MNEK Hetan Apoiu Finansa husi FDCH

0
148
Sekretáriu Ezekutivu FDCH, Isménio Martins da Silva kaer liman ho MNEK, Aurelio Guterres. Foto: FDCH

DILI, (TATOLI) – Ministériu Negósiu Estranjeiru no Kooperasaun (MNEK) hetan apoiu finansa ho valór dolár 7.650,00 husi FDCH (Fundo Desenvolvimento Capital Humano) atu finansia formasaun ba diplomata seniór no mídia sira hamutuk ema na’in 22 atu aumenta no haforsa koñesimentu bainhira destaka ba serbisu iha rai li’ur.

Ministru Negósiu Estranjeiru no Kooperasaun, Aurelio Guterres, apresia no agradese ho apoiu ne’ebé FDCH oferese hodi realiza formasaun ba diplomata seniór sira atu mellora liutan sira-nia koñesimentu.

“Espesifikamente atividade sira ne’ebé sei halo iha semana ida ne’e nia laran, sei foku ba formasaun iha diplomata seniór sira ho kareira mídia sira iha MNEK atu oinsá prepara aan antes ba destaka iha rai li’ur”, hateten Aurelio Guterres iha MNEK, Praia dos Coqueiros, segunda ne’e.

Aurelio Guterres hateten formasaun ne’e hola parte ba planu ne’ebé trasa ona iha tinan rua liu-ba, oinsá mak aumenta, haforsa no melhora koñesimentu diplomata sira iha Ministériu nomós abilidade linguístika iha ministériu.

Sekretáriu Ezekutivu FDCH, Isménio Martins da Silva, hateten FDCH hetan priviléjiu atu serbisu hamutuk ho MNEK atu haforsa liutan kapasidade diplomata sira nian.

“Orsamentu ne’ebé FDCH aloka hodi apoiu ba formasaun ne’e ho montante orsamentu purvolta $7.650 00 hodi apoiu no finansia através de instituisaun Synergy policy ne’ebé servisu mós ho embaixada Repúblika Indonézia iha ne’e, ne’ebé ita konvida formadora ne’e mai husi Indonézia”, dehan Isménio Martins da Silva.

Sekretáriu Ezekutivu FDCH ne’e orgullu no fiar katak formasaun durante semana ida sei apoiu no haforsa liután diplomata sira tanba maioria destaka ona iha rai li’ur, nune’e mós FDCH sempre prontu atu servisu hamutuk di’ak liután ho MNEK.

Entretantu, Embaixadór Indonézia ba Timor-Leste, Sahat Sitorus, ne’ebé partisipa iha abertura ba serimónia formasaun ne’e orgullu tanba liuhusi formasaun bele hasa’e liután kapasidade diplomata sira nian atu hala’o sira-nia servisu ho profisionál liután iha rai li’ur.

“Ami mós orgullu hola parte mós iha dezenvolvimentu kapasidade diplomata timoroan sira atu iha kapasidade ne’ebé di’ak liu iha mundu”, dehan Sahat Sitorus.

Formadór ne’ebé fó formasaun ba diplomata sira ne’e mai husi formadora no espesialista sira iha área diplomasia internasionál husi Indonézia.

Jornalista: Rafy Belo

Editora: Rita Almeida

HUSIK IDA HATÁN