MKOTT Ejize Parlamentu TL no Austrália Ratifika Akordu Ketan Tasi

0
86
MKOTT iha embaixada Austrália nia oin. Foto dokumentasaun: La’o Hamutuk

DILI, (TATOLI) – Movimentu Kontra Okupasaun Tasi Timor (MKOTT) ejize ba Parlamentu Nasionál (PN) Timor-Leste (TL) no Austrália ratifika akordu ketan (fronteira) tasi Timor ne’ebé mak asina ona ohin husi governu rai rua, iha Novaiorke Estadu Unidu Amérika (EUA).

“MKOTT husu ba parlamentu Austrália atu bele ratifika lalais akordu ida ne’e ho sein kondisaun, basá iha pasadu Austrália foin bele ratifika tratadu tasi Timor 2002 ne’e iha 2003 hafoin Timor-Leste fó serteza ba futuru dezenvolvimentu Greater Sunrise nian”, afirma reprezentante sosiedade sívil, Juvinal Dias, iha fatuhada molok entrega karta ejizénsia no apresiasaun ba embaixada Austrália.

Reprezentante ne’e konsidera asinatura ba akordu ne’e hanesan vitória ba Timor-Leste tanba pela primeiravez Austrália rekoñese soberania TL nian ba tasi Timor. Ne’e, buat ida fundamentu.

Povu Timor hotu selebra, tinan barak Austrália uza nia poder polítiku, ekonómiku hodi ukun, domina, okupa tasi Timor, loloos pertense ba povu Timor.

Ohin dader, loraik iha estadu unidu, hothotu asiste ona pasu importante, vitória ida mai TL katak hetan tan soberania.

Dias afirma luta libertasaun pátria nian no La’o Hamutuk nu’udar sosiedade sívil, ema ne’ebé partisipa iha movimentu hakarak apresia ba kontribuisaun tomak ne’ebé estudante, veteranu, ativista, povu Timor-Leste tomak ba apoiu sira ba luta ne’e.

“Ami hanoin katak ho povu nia partisipasaun konsege fó espíritu ba ita-nia maun boot sira hodi bele negósia direitu Timor-Leste nian ba prinsípiu no direitu internasionál nian”, dehan peskizadór La’o Hamutuk ba jornalista sira hafoin asiste asina akordu husi video online http://webtv.un.org/, iha sede La’o Hamutuk, Bebora.

Perspetiva ba futuru

“Ami espera katak Parlamentu Nasionál Timor-Leste no Austrália bele halo ratifikasaun atu nune’e rai rua ne’e bele rekoñese direitu ida-idak nian no ratifikasaun ne’e bele halo sein kondisaun, katak halo la’ós tanba interese seluk maibé interese atu respeita direitu Timor no Austrália nian. Katak, Austrália tenke ratifika tanba direitu ida ne’e merese duni ba povu Timor-Leste”, espera peskizadór La’o Hamutuk.

Entretantu, atividade ne’ebé hala’o iha sede La’o Hamutuk hafoin asiste asina akordu fronteira marítima ne’e ativista, veteranu no estudante balun selebra vitória hamutuk.

Tuir mai, halo marsa naruk ba embaixada Austrália no hetan seguransa husi Polísia Nasionál Timor Leste (PNTL), hotu halibur no fahe malu iha AMRT (Arkivu no Múzeu Rezisténsia Timor-Leste).

“Ohin ne’e ativista sira, estudante balun, veteranu balun hakarak atu selebra vitória ida ne’e liuhusi halo long march (marsa naruk) depois entrega apresiasaun ba governu Timor-Leste no Austrália tan konsege tuur hamutuk hodi rezolve problema fronteira marítima; husu mós ba sira atu nafatin mantein, respeita kualker nasaun ida nia soberania”, realsa.

Iha biban ne’e, MKOTT mós apresia ba povu, estudante, ativista, eis-rezisténsia sira, partidu polítiku no grupu solidariedade sira iha nasaun li’ur sira nomós iha rai laran ne’ebé sempre no kontinua firme atu kontinua luta ba soberania Nasaun nian.

Antes ne’e, iha 23 fevereiru 2016, MKOTT mós husu ba Austrália tenke respeita no trata soberania no dignidade Timor-Leste nian hanesan mós sira halo ba nasaun seluk.

Austrália tenke fila ba mekanizmu disputa fronteira marítima nian tuir jurisdisaun Tribunál Internasionál ba Justisa [International Court of Justice] no Tribunál Internasionál ba Lei Tasi nian [ITLOS].

Austrália tenke halo negosiasaun ho governu Timor-Leste ho vontade ne’ebé di’ak no labele kontinua argumentu kona-ba “Plataforma Kontinentál” ne’ebé la válidu ona.

Seluk mak MKOTT husu Austrália nu’udar nasaun boot labele uza nia poder ekonomia no polítika iha rejiaun ne’e atu kontinua na’uk futuru timoroan sira nian.

Enkuantu, tuir komunikadu ne’ebé TATOLI asesu husi embaixada Austrália iha Dili, ohin, ko’alia katak akordu fronteira marítima hanesan konkordánsia istóriku ne’ebé mak loke kapítulu foun iha relasaun bilaterál.

Ida ne’e estabelese fronteira marítima entre nasaun [Austrália no Timor-Leste-red] nomós Réjime Espesiál Greater Sunrise nian ba dezenvolvimentu, esplorasaun no jestaun konjunta ba área gás Greater Sunrise nian.

Akordu ida ne’e refleta parseiru nasaun rua ne’ebé futu hamutuk iha área jeográfia no lasu profundu iha istória ho amizade.

Hanesan belun di’ak no viziñu besik, Austrália hakarak Timor-Leste bele atinji ninia potensiál ekonómika. Austrália hatene katak dezenvolvimentu Greater Sunrise buat importante loos hodi dezenvolve Timor-Leste.

Austrália fó obrigadu ba Komisaun Konsiliasaun Independente ba ninia serbisu atu hetan opsaun dezenvolvimentu sira ba Greater Sunrise. Austrália la iha preferénsia gazodutu ‘pipeline’ mai Timor-Leste ka Austrália.

Austrália hakarak katak Greater Sunrise bele dezenvolve iha maneira ekonomikamente di’ak ne’ebé fó benefísiu barak ba Timor-Leste. Ida ne’e sei apoiu husi setór privadu petrolíferu, husi parseiru joint venture sira. Ninia kapasidade atu dezenvolve no jere projetu ida ne’e depende se viável ekonomikamente ka lae.

“Ami sei serbisu nafatin no kontinua halo maka’as liu relasaun bilaterál entre Austrália ho Timor-Leste”, refere komunikadu ne’e.

Jornalista: Rafy Belo

Editora: Rita Almeida

HUSIK IDA HATÁN