Marí Prefere Rezerva Greater Sunrise Ba Jerasaun Futuru

0
118
Sekretáriu Jerál Partidu FRETILIN, Marí Alkatiri.

DILI, (TATOLI) – Primeiru-Ministru, Marí Alkatiri, hateten presiza rezerva kampu minarai hanesan Greater Sunrise ba jerasaun aban-bainrua, tanba fundu minarai ne’ebé oras ne’e Timor-Leste iha sufisiente hela atu dezenvolve Nasaun.

Tuir nia importante maka halo jestaun didi’ak ba fundu minarai ne’ebé iha atu bele fó impaktu ba dezenvolvimentu.

“Ita halo akordu ida para bele rezerva Greater Sunrise atu investe ba jerasaun aban bainrua”, katak Marí ba jornalista sira iha Palásiu Prezidente Nicolau Lobato, Bairru Pité, tersa ne’e.

Kona-ba kadoras Greater Sunrise, Marí hatán uluk kedas Governu defende kadoras Greater Sunrise mai Timor maibé tékniku sira mai ho dadus katak téknikamente no ekonómikamente la viável, maibé tenke diskute lai.

“Ema ida fó nia opiniaun ita labele fiar kedas. Ita tenke diskute lai. Ita mós tenke fó ita nia opiniaun rasik. Ita hakarak impaktu ekonómiku iha rai laran”, dehan Xefe Governu.

Marí hatutan dada kadoras mai Timor fó vantajen tanba iha impaktu ekonómiku liu-liu benefísiu kolaterál no efeitu multiplikadór.

“Tanba ne’e maka ita presiza kálkula katak ita hein simu osan de’it maka di’ak liu, ka lori prosesamentu mai rai laran. Ba ha’u, lori prosesamentu mai rai laran maka di’ak liu”, afirma.

Iha biban ne’e, nia mós hateten bainhira seidauk halo negosiasaun ho Indonézia, signifika akordu fronteira marítima seidauk kompletu, tanba ne’e, presiza halo negosiasaun ho Indonézia para akordu ida ne’e sai kompletu. 

Jornalista: Xisto Freitas

Editora: Rita Almeida

HUSIK IDA HATÁN