MAP Prepara Hela Dokumentu Planu Estratéjiku Peska Nian

0
100
Ilustrasaun hosi google.

DILI, (TATOLI) – Diresaun Jerál Peska, Ministériu Agrikultura no Peska (MAP) prepara hela dokumentu planu estratéjiku peska nian ne’ebé sei sai hanesan matadalan, tanba Timor-Leste iha ona lei peska, polítika no instrumentu internasionál ne’ebé tenke halo tuir.

Diretór Jerál Peska, MAP, Acácio Guterres, hatete tanba lei peska Timor-Leste nian mós tinan 10 resin ona maka oinsá atu armoniza fali ho dokumentu ne’e ho baze legál ne’ebé iha para sai matadalan hodi jere rekursu tasi-laran para iha sustentabilidade.

“Matadalan ida ne’e oinsá mak lori ita atu dezenvolve ita-nia rekursu tasi, oinsá mak aproveita esplora ita-nia rekursu ho sustentabilidade, entaun iha dokumentu ida ne’e mak ita sei tuur hamutuk hodi haree, oinsá mak tau ideia para hotu-hotu bele aplika bainhira laiha kontradisaun ho instrumentu ne’ebé iha”, hatete bainhira halo konsultasaun ho ministériu relevante iha Komoro, ohin.

Dokumentu ne’ebé agora prepara hotu ona no hetan mós apresisaun husi entidade hotu. Hodi hatutan matadalan ne’e sei halo mós konsultasaun iha munisípiu hotu no sei fahe ba fatin lima.

“Iha parte súl maka sei tau iha Ainaru-Hatudu depois konvida peskadór husi Suai, Same para bá tuur hamutuk iha sentru. Iha parte leste sei tau iha Baukau, ita konvida peskadór husi Lautein, Vikeke, Manatutu no Baukau rasik depois iha parte norte sei tau iha Maubara, konvida peskadór husi Bobonaru no Dili rasik bá no ida sei tau iha Ataúru no Oekusi”.

Hafoin konsultasaun sei konvida fali reprezentante husi fatin sira ne’e para mai hamutuk fali iha Dili hodi loke fórum ida atu tau ideia hamutuk sobre dokumentu ne’e para mellora liután tanba peskadór sira mak sei implementa barak liu, nune’e presiza sira-nia ideia, katak tan.

“Dokumentu ida ne’e ita planu iha setembru tinan ne’e bele remata, depois Ministru Agrikultura lori ba Konsellu Ministru para hetan apresiasaun no sai dokumentu legál ida oinsá mak la’o tuir”.

Jornalista: Maria Auxiliadora

Editora: Rita Almeida

HUSIK IDA HATÁN