Lú Olo Husu Veteranu Sira Aproveita Konsellu Nasionál Veteranu

0
69
Prezidente Repúblika, Francisco Guterres Lú Olo. Imajen Mídia Palásiu PR.

DILI, (TATOLI) – Prosesu harii Konsellu Nasionál Veteranus la’o di’ak daudaun ona, tanba ne’e apela ba veteranu sira atu aproveita Konsellu Nasionál foun ne’e hodi tulun, promove, habelar no dezenvolve nu’udar liman-rohan morál no ezemplu serbisu ho laran ba nasaun.

Prezidente Repúblika, Francisco Guterres Lú Olo, hato’o apelu ne’e liuhusi seremónia komemorasaun Loron Nasionál Veteranu ba  ba dahuluk ne’ebé hala’o iha Palásiu Governu, Dili, sábadu dadér ohin.

Tuir nia veteranu sira hanesan mós sidadaun baibain pátria nian, maibé sira tenke hatene sai hanesan inspirasaun ba país.

“Ita presiza promove ezemplu di’ak kona-ba sidadaun ne’ebé mak kontribui hodi proteje komunidade no tane ás ita-nia identidade no kultura nasionál”, esplika.

Lú Olo hatutan Estadu mós merese rekuñese veteranu sira tanba ezemplu serbisu laran-luak ne’ebé mak sira fó hodi defende no tane aas nasaun.

Kriasaun Konsellu Nasionál Veteranu iha prosesu nia laran ona.

Antes ne’e, eis Prezidente Repúblika, Taur Matan Ruak, veta polítika ba proposta Kriasaun Konsellu Nasionál Veteranu tanba kompozisaun hosi Konsellu Nasionál Veteranu seidauk reprezentativu.

Hafoin ne’e, atuál Prezidente Repúblika, Francisco Guterres Lú Olo, mós veta jurídiku ba proposta kriasaun Konsellu refere tanba artigu balun viola Lei Inan.

Oras ne’e, Proposta Kriasaun Konsellu ne’e iha ona Governu nia liman, liu-liu Sekretaria Estadu Veteranus atu hadi’a buat balun ne’ebé seidauk loos.

Jornalista: Xisto Freitas

Editora: Rita Almeida

HUSIK IDA HATÁN