Lisensiamentu Komersiál La Eziste Ona

0
257
Diretór Ezekutivu SERVE, Florêncio Sanches.

DILI, (TATOLI) – Diretór Ezekutivu, Servisu Rejistrasaun no Verifikasaun Emprezariál (SERVE), Florêncio Sanches, hatete lisensiamentu komersiál ba empreza sira daudaun ne’e la eziste ona, maibé agora iha de’it sertifikadu autorizasaun ba kategoria tolu.

“Autorizasaun ba risku ki’ik, baixu no altu. Se karik iha autoridade ruma ba halo inspesaun lalika ezije dehan lisensiamentu komersiál tanba laiha ona”, Florêncio hatete iha Matadouru, ohin.

Tanba ne’e esforsu boot ne’ebé SERVE halo mak sei bá uluk internál instituisaun Estadu ka liña ministeriál atu fó hatene katak país ida ne’e la emite ona lisensiamentu komersiál maibé emite de’it suratahan ida mak hanaran autorizasaun.

“Entaun liña ministeriál tenke hatene katak se bá halo vistoria ruma, karik hatene ona atu lalika husu dokumentu ida ne’e (lisensiamentu komersiál) tanba laiha ona”.

Aleinde ne’e sobre vistoria tuir lei hatete halo dalaida de’it ba nia vida tomak antes negósiu ida hahú.

“La’ós nia autorizasaun mate bá halo fali vistoria, lei lahatete nune’e, tanba ne’e mak ministériu relevante presiza hatene ida ne’e. Vistoria dala ida, se dala rua iha razaun mak uluk nia (empreza) hatama pedidu mai loke iha Kolmera, maibé taka tiha no muda fali ba Bidau entaun vistoria halo tan mas iha Kolmera mak mantein nafatin iha tinan 10, vistoria nunka akontese dala 10. Vistoria halo dala rua, tolu konforme sé nia muda nia estabelesimentu ne’e”.

Liga ba atividade ne’ebé hala’o husi Autoridade Inspesaun no Fiskalizasaun ba Atividade Ekonómika no Sanitária (AIFAESA) liuliu ba restaurante sira, Koordenadór AIFAESA, Abílio Oliveira Sereno, bainhira notifika hodi taka temporariamente restaurante hamutuk 23 ne’ebé laiha kondisaun ijiene foin lais ne’e husu atu parte relevante ne’ebé fó lisensa ka autorizasaun haree kondisaun antes estabelesimentu sira ne’e halo nia atividade, liuliu vistoria molok hahú sira-nia negósiu iha hahán nian.

Koordenadór hatutan maski restaurante sira ne’e iha autorizasaun mas laiha kondisaun ladi’ak sei taka no lahusik atu loke.

“Tanba entidade ne’ebé fó lisensa lamai halo vistoria, vistoria ne’e para haree sira ne’e iha kondisaun para fó lisensa ka la’e? Komesa agora bá oin restaurante ne’ebé iha lisensa, maibé laiha kondisaun ami sei taka”, katak nia foin lais ne’e.

Husi parte SERVE simu ona notifikasaun husi AIFAESA sobre restaurante sira, maka hahú iha fevereiru ne’e loroloron SERVE relata ona ba AIFAESA no responde katak bainhira iha inspesaun mak restaurante balun latuir padraun ne’ebé iha mak AIFAESA iha kbiit atu taka.

“Depois AIFAESA taka tiha, notifika fali mai SERVE atu notifika fali empreza hodi kumpri saida mak sira sei falta, depois ne’e ami sei hasai fali sertidaun sertifikadu bazea ba sira-nia pedidu”.

Nune’e AIFAESA no SERVE sei tuur hamutuk hodi ko’alia sobre restaurante lubuk ida ne’ebé mak taka ne’e hodi halo loos filafali.

Jornalista: Maria Auxiliadora

Editora: Rita Almeida

HUSIK IDA HATÁN