“Labele Fó Parabéns Ba Ha’u”

0
363
Xefe Negosiador Prinsipál Fronteira Marítima, Kay Rala Xanana Gusmão

DILI (TATOLI)–Xefe Negosiador Prinsipál Fronteira Marítima, Kay Rala Xanana Gusmão lakohi ema ida fó parabéns ba nia, ba rezultadu ne’ebé ekipa Negosiador Fronteira Marítima hetan, maibé  parabéns ba Timoroan tomak hotu.

“Ha’u tuir de’it sakrifísiu ne’ebé veteranus sira uluk hanorin. Povu mak parabéns tanba nia hetan nia soberania,” Kay Rala Xanana Gusmão fó sai liuhosi nia intervensaun iha sede Partidu CNRT, Bairru Sentrál, ohin.

Xanana fó hanoin katak, Timor-Leste hetan ona nia independénsia polítika, hetan tan ona soberania, tanba ne’e, Timoroan sira hotu tenke asegura independénsia ekonómika hodi ka’er metin Timor-Leste nia riku soin.

Ne’e duni, Xanana la haluha hato’o agradesimentu wain ba veteranus sira hotu ne’ebé kontinua fanu nafatin martir eroi libertasaun nasionál.

“Ita hotu nia luta, Ita hotu mak manan. Agora períodu polítiku foun hahú fali ona aban hanesan ne’e,” Xanana realsa.

“Inan aman sira, labarik, joven no katuas sira hakilar hodi fó obrigadu ba ha’u, maibé ha’u hakarak dehan, ha’u nia papél iha negosiasaun fronteira Marítima ne’e ki’ik oan tanba ne’e povu tenke agradese advogadu sira no ekipa tomak ba negosiasaun tanba sira mak ita hetan ona direitu.”

Maski nune’e Xanana sente kontente ho entuziazmu ne’ebé povu hatudu iha Aeroportu Nicolau Lobato hodi simu nia, hafoin fulan neen hela iha ema nia rain (estranjeiru)

“Ha’u kontente kuandu ami to’o iha Aero Portu Internasionál Nicolau Lobato, imi hotu hakilar hodi fó obrigadu tanba ami lori vitória murak mai Repúblika Demokrátika Timor-Leste (RDTL),” nia espresa sentimentu kontente.

Iha parte seluk, Carminda Mafalda sente kontente no agradese tebes ba Xanana Gusmão ho nia ekipa tomak ne’ebé lori rezultadu pozitivu ba  Timor-Leste.

“Ami kontente tebes mezmu rai ne’e manas no atu udan fali, maibé ami nafatin hein ekipa negosiasaun tomak tanba sira lori vitória mai Timor-Leste no ba jerasaun sira nia futuru,” Carminda Mafalda haktuir iha Aeroportu Internasionál Nicolau Lobato, ohin.

Kay Rala Xanana Gusmão ho nia ekipa to’o iha Dili, Aeroportu Internasionál Nicolau Lobato ho Aviaun Sriwijaya iha tuku 13H45, oras Timor-Lorosa’e, no simu direita hosi membru governu, veteranus, povu, inklui militante Aliansa Mudansa ba Progresu (AMP) sira. Enkuantu Xefe governu la marka.

Jornalista : Zezito Silva

Editór : Manuel Pinto

HUSIK IDA HATÁN