Konsultóriu Jornalista Promove Tan Simulasaun Debate ho Portugés

0
32

DILI, (TATOLI) – Jornalista timoroan sira husi mídia imprensa, elektrónika, online inklui asesoria imprensa ne’ebé tuir formasaun konsultóriu língua portugeza-nível B2 promove tan simulasaun debate ho lian portugés.

Formasaun ida ne’e promovidu tanba kooperasaun Sekretáriu Estadu Komunikasaun Sosiál no Institutu Camões.

Iha simulasaun debate, iha Sentru Formasaun Institutu Camões, Kintál-boot, tersa ne’e, formandu ida-idak sai protagonista hodi halo aprezentasaun no debate kona-ba asuntu sosiál, ekonomia no saúde. Saúde mak sai asuntu debatidu liu.

Iha asuntu ne’e, formandu sira debate kona-ba avansu no dezafiu iha setór saúde, problema grave sira hodi rezolve no solusaun inklui prinsípiu doensa sira ne’ebé mak afeta ba timoroan sira ho dalen portugés.

Kazu ne’ebé formandu  sira akresenta iha simulasaun debate ne’e mak infesaun vias respiratória, AVC (Asidente Vaskulár Serebrál) ka stroke, malaria, tabajizmu nomós ginekolojia ho obstetrísia.

Kona-ba AVC, Pricília Fonseca, nu’udar formandu ida dehan katak fatór balun ne’ebé tuir nia kumprensaun, hamosu risku AVC mak fuma, alkohol no konsumu hahan ho substánsia kolesteról aas ka barak liu no frekuénsia uza masin barak.

Sintoma balun husi AVC mak derepente matan la moos hodi haree objetu ruma, ulun moras derepente la hatene tanbasá ka saida mak nia kauza, ko’alia laloos derepente nomós liman ain mós namlaek derepente.

Tanba ne’e, iha simulasaun debate ne’e, nia sujere katak atu evita ka prevene moras ida ne’e, tuir nia hanoin mak hamenus uza masin iha família ka individu ida-idak, konsumu hahan ne’ebé mak saudável, hamenus no hapara fuma no halo ezersísiu bebeik no regulár.

Xisto Ximenes, nu’udar mós formandu ida enkoraja no sujere katak atu moris saudável depende ba ita ida-idak nia aan rasik. Nune’e presiza hakbesik aan ba ospitál, sentru saúde [públiku ka privada] nune’e mós profisionál saúde sira hodi halo no hetan konsulta.

“Ospitál ne’e ita hotu nian; ba timoroan hotu, tanba ne’e keta ta’uk hodi ba halo diagnóstika,” sujere formandu ne’e perante formandu sira seluk durante simulasaun debate ne’ebé lidera husi formadora, Claúdia Taveira.

Hafoin simulasaun debate formadora, Claúdia Taveira fó sai nia rezultadu avaliasaun jerál hateten katak “erro é humano” tanba erru ki’ikoan sira ne’ebé mosu iha debate ne’e normál. Nia mós konsidera katak formandu hirak ne’e iha ona “posibilidade” hodi bele halo ka lori programa ho portugés tanba nota katak formandu sira ne’e iha kondisaun hodi halo komunikasaun ho lian ofisiál ne’e. “Parabéns,” kongratula lakonikamente formadora ne’e.

Entretantu, kona-ba saúde, tuir Planu Estratéjiku Dezenvolvimentu Nasionál [PEDN] katak to’o 2030 sei iha ospitál ida-idak iha muníspiu 13, ospitál espesializadu ida iha Díli, pursentu 100 ba estabelesimentu saúde totalmente ekipadu ho pesoál saúde hodi halo akompañamentu ba moras krónika sira.

Tuir mai, pursentu 100 ba servisu saúde sira ho infra-estrutura funsionál, segura, amiga ho ambiente no sustentável no sei iha servisu saúde ne’ebé abrajente ho alta kualidade asesível ba povu timoroan sira.

Tanba ne’e estratéjia no asaun sira ne’ebé halo mak to’o 2030 Timor-Leste sei iha populasaun ne’ebé saudável, nu’udar rezultadu servisu saúde abrajente no kualidade aas ne’ebé bele asesu husi sidadaun timoroan sira. Tanba ida ne’e, sei ajuda hamenus ki’ak, aumenta nível rendimentu no mellora produtividade nasionál.

Atu konkretiza asaun ida ne’e governu Timor sei hala’o kna’ar iha área fundamental tolu hanesan; prestasaun servisu saúde sira, rekursu umanu no infra-estrutura saúde nian.

Jornalista: Rafy Belo

Editora: Rita Almeida

HUSIK IDA HATÁN