Konseitu Korupsaun Seidauk Tama iha Lei

0
32
Primeiru Ministru, Marí Alkatiri .

DILI, (TATOLI) – Primeiru-Ministru, Marí Alkatiri, hateten konseitu korupsaun seidauk tama iha lei, tanba ne’e maka termu ne’ebé durante ne’e judisiál uza ba pesoál ne’ebé komete korupsaun ne’e la’ós koruptór maibé partisipasaun ekonomia.

“Agora ita la’o de’it ho baze Kódigu Penál katak artigu balun hosi Kódigu Penál ne’e prevé de’it partisipasaun ekonómiku, maibé la’ós korupsaun”, Xefe Governu hato’o ba jornalista sira iha Palásiu Prezidente Nicolau Lobato, Bairru Pité, tersa ne’e.

Marí esplika Estadu ida ne’e kria ona Komisaun Antí Korupsaun (KAK) maibé Lei Antí Korupsaun toba hela iha gaveta Parlamentu Nasionál nian, entaun sei susar tebes ba KAK no Ministériu Públiku atu halo investigasaun ba korupsaun tanba seidauk aprova ba lei ne’e.

“Ami hanoin ona katak iha Parlamentu Nasionál foun mai ne’e sei tau prioridade ba Lei Antí Korupsaun”, promete.

Kona-ba auditória, nia hatán Prezidente Tribunál ba Konta atuál Prezidente Tribunál Rekursu, Deolindo dos Santos, dehan hafoin aprezenta relatóriu auditória ba Zona Espesiál Ekonomia Sosiál Merkadu (ZEESM) iha 2016 ninian, sira sei hahú fali foun.

Marí mós husu Tribunál Rekursu atu kontratu empreza internasionál sira atu halo auditória ba ministériu sira hosi Governu anteriór.

Jornalista: Xisto Freitas

Editora: Rita Almeida

HUSIK IDA HATÁN