Komité Orientadór 25 Aprejenta Menus Orsamentu ba PM

0
128
Partisipasaun joven rezisténsia ne'ebé koñesidu ho masakre Santa Kruz. Foto google

DILI, (TATOLI) – Komité orientadór 25, ohin aprejenta preokupasaun kona-ba menus orsamentu hodi apoiu atividade oinsá  hakerek livru istória rezisténsia juventude no estudante ba libertasaun nasionál hahú 1974  to’o 1999, ba Primeiru-Ministru, Marí Alkatiri, iha Palásiu Governu.

Xefe Governu haktuir komité orinetador 25 ne’e forma ho rezolusaun Konsellu Ministru iha fevereiru 2017 ho misaun hodi hakerek istória kona-ba partisipasaun joventude durante prosesu luta ba libertasaun nasionál.

ʺSira aprejenta planu no programa tanba sira presiza apoiu, agora ho duodesimu ne’e fasil ou difísil ita sei buka dalanʺ, dehan Alkatiri.

Hodi akresenta prosesu luta ba ukun ám, joven maka sai forsa prinsipál, tanba ne’e estudu ne’e atu hakerek loloos istória ba jerasaun foun sira agora no futuru.

Membru komité ne’e kompostu hosi joven rezisténsia sira ne’ebé lidera hosi eis ministru no joven rezisténsia, Constâncio Pinto no 20 resin seluk ho nia mandatu tinan lima hahú 2017 to’o 2021.

ʺSira bee halibur án iha komité ne’e ema luta nain sira ne’ebé hatene luta ne’e la’o oinsá”, tenik tan.

Rezultadu estudu ne’e sei prodús ba livru istória hodi hanorin estudante sira iha eskola komesa hosi ensínu báziku to’o universidade.

ʺJoven barak la hatene sé mak Nicolau Lobato no Nicolau Lobato mate ho tinan hira, maibé la hateneʺ, haktuir.

Prezidente Komité 25, Constâncio Pinto, hateten hasoru malu ho Xefe Ezekutivu ne’e, Xefe Governu fó apoiu ba komité hodi komesa hakerek istória ba jerasaun foun sira, tanba barak la hatene istória luta.

Durante ne’e komité halo ona rekrutamentu ba funsionáriu, kria sede no fasilidade servisu   no seluktán.

Intervistadór komité nian sei desloka ba munisípiu iha tempu besik hodi halo intervista atu hahú ona hakerek istória.

ʺKomité iha difikuldade, liliu ba orsamentu tanba ami benefisiáriu hosi tranferénsia públika liuhosi Sekretariu Estadu Juventude no Traballuʺ, dehan.

Komité oras ne’e iha ona funsionáriu rekrutadu hamutuk nain lima hodi servisu hamutuk ho membru komité .

Sekretariu Jeral Komité maka Avelino Coelho, Adjunta, Maria Dadi Magno, Primeiru Vise Jacinto Alves Segundo Vise, Gregorio Saldanha no seluktán.

Jornalista: Agapito dos Santos

Editora: Rita Almeida

HUSIK IDA HATÁN